Samarqandda talaba qiz yotoqxonaning 9-qavatidan sakrab, o‘z joniga qasd qilgani yuzasidan jinoyat ishi qo‘zg‘atildi

Samarqand davlat universitetiga qarashli talabalar yotoqxonasida 29-mart kuni soat 02:00 larda S.E. ismli talaba qiz o‘zini 9-qavatdan tashlab, vafot etgani haqida xabar berilgandi. Samarqand viloyati prokuraturasining ma’lum qilishicha, holat yuzasidan jinoyat ishi qo‘zg‘atilgan.

“Mazkur holat yuzasidan Samarqand shahar prokuraturasi tomonidan tergovga qadar tekshiruv harakatlari o‘tkazilib, Jinoyat kodeksining 103-moddasi (o‘zini o‘zi o‘ldirish darajasiga yetkazish) bilan jinoyat ishi qo‘zg‘atilib, tergov harakatlari olib borilmoqda”, — deyiladi xabarda.

Avvalroq Samarqand shahar prokuraturasi “Daryo”ga o‘z joniga qasd qilgan S.E. to‘g‘risida qo‘shimcha ma’lumot bergandi. Ma’lum qilinishicha, u turmush qurmagan bo‘lgan. Shuningdek, universitet mas’ulining ma’lumotiga ko‘ra, o‘qishdagi o‘qituvchi yoki kursdoshlari bilan nizoli holatlari, biror muammosi bo‘lmagan. Marhumaning xonadoshlari oxirgi vaqtlarda uning kayfiyati bo‘lmaganini bildirgan.

Eslatib o‘tamiz, 2021-yilning dekabrida Qashqadaryoda texnikum talabasi yotoqxonaning 5-qavatidan tushib ketib, vafot etgandi. Keyinroq “Daryo” muxbiri voqea tafsilotlarini o‘rganish maqsadida texnikum yotoqxonasi va o‘quv binosida bo‘lib, marhumani tanigan-bilganlarni suhbatga tortgan edi.