Boris Jonson Ukrainani kelgusida ham qo‘llab-quvvatlash borasida muzokaralar olib bordi

Buyuk Britaniya bosh vaziri Boris Jonson 29-mart kuni g‘arb davlatlarining rahbarlari bilan Ukrainaga ko‘mak berish va har tomonlama qo‘llab-quvvatlash masalalarini muhokama qildi. Bu haqda Jonsonning o‘zi Twitter’dagi sahifasida ma’lum qilgan.

“Bugun AQSH prezidenti Jo Bayden, Fransiya prezidenti Emmanuel Makron, Germaniya federativ respublikasi kansleri Olaf Shols va bosh vazir Mario Dragi bilan Ukrainaga har tomonlama ko‘mak berish va qo‘llab-quvvatlash haqida suhbatlashdim. Ukrainaga qarshi zo‘ravonliklarga barham berilmagunicha ushbu pozitsiyada sobit turamiz”, – deya tvit qoldirgan Jonson.

Buyuk Britaniya hukumati Jonson o‘tkazgan telefon suhbatlaridan birining mavzusi G‘arb mamlakatlarini Rossiya energiya resurslariga qaramligini kamaytirish bo‘lganini qayd etgan.

“G‘arb yetakchilari xalqaro energetik tuzilma formatini o‘zgartirishda birgalikda ishlash va Rossiya uglevodorodiga qaramlik ta’sirini kamaytirish masalalarini muhokama qildi”, – deyiladi London press-relizida.

Bayonotga ko‘ra Jonson G‘arb Ukrainadagi urush tufayli Rossiyaga nisbatan qo‘llayotgan cheklov choralarini susaytirmasligi zarurligini ta’kidlagan.

Muzokaralarning boshqa ishtirokchilari ham Ukrainani qo‘llab-quvvatlashda davom etishini bildirgan.

Avvalroq Jonson Londonning Rossiyaga nisbatan qo‘llanilgan sanksiyalarni tinchlik kelishuvi tuzilsa ham olib tashlamoqchi emasligini aytgandi. Eslatib o‘tamiz, 29-mart kuni Istanbulda Ukraina hamda Rossiya delegatsiyalari urushga barham berish yuzasidan navbatdagi muzokaralarni o‘tkazgan.