Bosh prokuratura huzuridagi departamentning Andijon shahar bo‘limi tomonidan “O‘zenergoinspeksiya” Andijon hududiy bo‘limining murojaatiga asosan o‘tkazilgan tergovga qadar tekshiruvda savdo majmuasi elektr energiyadan noqonuniy foydalangani aniqlandi.
Ma’lum bo‘lishicha, “B.M.M.” MCHJ mas’ul shaxslari tomonidan MCHJga qarashli “N.M.” savdo majmuasiga o‘rnatilgan onlayn elektron hisoblagichning himoya muhrlarini buzgan holda olib tashlab, o‘rniga texnik talablarga javob bermaydigan elektr hisoblagichni o‘zboshimchalik bilan o‘rnatgan. Natijada davlat va jamiyat manfaatlariga 1,5 milliard so‘m zarar yetkazgan.
Bundan tashqari, Andijon shahar ETK mas’ul shaxslari “N.M.” savdo majmuasiga yetkazib berilgan 1 kVt. soat elektr energiyasi uchun 1-tarif bo‘yicha to‘lov undirilishi lozim bo‘lsa-da, elektron hisob dasturiga 2-tarif bo‘yicha to‘lov amalga oshirilishi haqida ma’lumot kiritib, davlat va jamiyat manfaatlariga 491,4 million so‘m zarar yetkazilishiga sababchi bo‘lgani aniqlangan.
Mazkur holat yuzasidan Jinoyat kodeksining 185-2-moddasi (elektr, issiqlik energiyasi, gaz, vodoprovoddan foydalanish qoidalarini buzish) va 207-moddasi (mansabga sovuqqonlik bilan qarash) bilan jinoyat ishi qo‘zg‘atilib, tergov harakatlari o‘tkazilmoqda.
Izoh (0)