Andijonda 5375 dona “Lirika” va “Tropikamid” psixotrop dori vositalarini 12 ming dollarga sotmoqchi bo‘lgan shaxs qo‘lga olindi. Bu haqda “Daryo” muxbiri xabar bermoqda.
Viloyatda katta miqdorda kuchli ta’sir qiluvchi moddalar savdosi bilan shug‘ullanuvchi shaxslarning noqonuniy harakatlariga chek qo‘yish maqsadida tezkor tadbirlar o‘tkazilgan. Tadbir davomida Xo‘jaobod tumanida yashovchi 32 yoshli I.P. jami 5375 dona “Lirika” va “Tropikamid” psixotrop moddalarini 12 ming dollarga sotayotganda ashyoviy dalillar bilan ushlangan.
Shuningdek, qiymati 318 million so‘mga teng bo‘lgan, qo‘shni davlatlardan aylanma yo‘llar bilan kontrabanda qilingan 4231 dona “Tropikamid”, “Lirika” va “Regapen” psixotrop moddalarini Andijon shahrida sotishni reja qilgan 1986-yilda tug‘ilgan A.X. va A.F.lar tezkor tadbirlar davomida qo‘lga olingan.
Mazkur holatlar yuzasidan viloyat bojxona boshqarmasi tomonidan I.P.ga nisbatan Jinoyat kodeksining 251-moddasi (kuchli ta’sir qiluvchi yoki zaharli moddalarni qonunga xilof ravishda egallash) bilan jinoyat ishi qo‘zg‘atilib, ularga nisbatan qamoq ehtiyot chorasi qo‘llanilgan.
Izoh (0)