“Manchester Yunayted” yozda Harri Keyn bilan shartnoma imzolamoqchi.
The Athletic’ning xabariga ko‘ra, mankunianliklar hujum chizig‘ini kuchaytirishni asosiy maqsad qilib olgan. “Tottenhem” hujumchisi nomzodlar ichida eng ma’quli bo‘lib turibdi.
Bir yil oldin “qizil iblislar”ning sobiq vitse-prezidenti Ed Vudvord “shporlar” prezidenti Deniel Levi bilan Keyn masalasida muzokara o‘tkazgandi. O‘sha vaqtda hujumchiga “Manchester Siti” ham qiziqish bildirayotgandi. “Manchester Yunayted” 73 million funtga Jeydon Sancho transferini amalga oshirganidan so‘ng, Keynni xarid qilishning imkoni bo‘lmadi va shunda Vudvord angliyalik hujumchini 2022-yilda olib kelish mumkinligini ma’lum qilgandi.
Harrining pozitsiyasi qat’iy, uning “shporlar” bilan shartnomasi 2024-yilda o‘z nihoyasiga yetadi. Hujumchi shartnomani uzaytirishni xohlamayotgani hisobga olinsa, “Tottenhem” uning transferidan katta pul ishlab olish uchun shu yozda sotib yuborishi kerak bo‘ladi. Xabarlarga ko‘ra, yozda 29 yoshga kiradigan futbolchining transfer narxi 100 million funt bo‘lishi mumkin.
“Manchester Yunayted” yangi murabbiy borasida bir to‘xtamga kelmagan, ammo bu masalani ham tezroq aniqlashtirib olmoqchi. Transferlar bilan shug‘ullanishi uchun mavsum so‘ngiga qadar murabbiyni ham tayinlamoqchi. Rahbariyat yangi murabbiy kim bo‘lishidan qat’i nazar Harri Keyn transferini amalga oshirish istagida.
Keyn joriy mavsum “Tottenhem” safida barcha musobaqalarda 41 ta o‘yinda maydonga tushib, 22 ta golga mualliflik qildi.
Izoh (0)