Toshkentda kuchli shamol kuzatilayotgani sabab haydovchilarga avtomobillarni daraxt tagida qoldirmaslik tavsiya qilindi

IIV Yo‘l harakati xavfsizligi xizmati ayrim hududlarda, shuningdek, Toshkent shahrida shamol tezligi kuchayib borayotgani sabab ogohlantirish bilan chiqdi.

“Barcha haydovchilardan yo‘llarda ehtiyotkor bo‘lishlarini, transport vositalarini daraxt yoki kuchli shamolga chidamsiz joylarda qoldirmasliklarini so‘raymiz”, — deyiladi xabarda.

“O‘zgidromet” 26-mart kuni O‘zbekistonga yana nam va salqin havoning bir qismi kirib kelishini ma’lum qilgandi. Respublikaning shimolidan tashqari barcha viloyatlarda yana bulutli va yomg‘irli ob-havo bo‘lishi kutilmoqda. Farg‘ona vodiysi viloyatlarida kunning ikkinchi yarmida yomg‘ir yog‘adi. Kunduz kuni harorat 12-15 daraja iliqqacha pasayadi. 26-martda respublikaning ayrim joylarida shamol tezligi 18-23 metr/sekundgacha kuchayishi kutilmoqda.

Eslatib o‘tamiz, 12-mart kuni Toshkent shahri Mirzo Ulug‘bek tumanida avtomobillar ustiga daraxt qulab tushgan. Favqulodda vaziyatlar vazirligi fuqarolardan kuchli shamol va yog‘ingarchilik vaqtida avtotransport vositalarini daraxtlar ostida qoldirmaslikni so‘ragan. Shuningdek, Qamchiq dovonidagi ikki tunnel orasida joylashgan hududda bir kecha-kunduzda juda ko‘p yog‘ingarchilikdan hosil bo‘lgan suv oqimi avtomobil yo‘lining ostki qismini o‘pirib tushirgan. 18-mart kuni Toshkentda daraxt 6 ta mashina ustiga qulab tushgandi.