Garet Beyl qachon futbolchilik faoliyatini tugatishini aytdi

“Real” yarim himoyachisi Garet Beyl tez orada faoliyatini yakunlashi mumkinligi haqida aytib o‘tdi.

Cope’ning xabariga ko‘ra, 32 yoshli futbolchi Uels terma jamoasi mundialga chiqmasa, butsasini mixga ilishga tayyorligini bildirgan.

JCh—2022 saralashi pley-off yarim finalida Uels Avstriyani 2:1 hisobida mag‘lub etdi. Uchrashuvda Beyl dubl qayd etdi. Iyun oyida bo‘lib o‘tadigan Shotlandiya—Ukraina uchrashuvi g‘olibi finalda uelsliklarga raqib bo‘ladi. Agar jamoasi g‘alaba qozona olmasa, Garet faoliyatini yakunlashini ta’kidlagan.

Avvalroq Beyl o‘ynash imkoniyati berilsa, jarimadan ham gol ura olishini aytgandi.

Garet Beyl “Real” safida 2021/22-yilgi mavsum barcha musobaqalarda 5 ta o‘yinda maydonga tushib, o‘z hisobiga bitta gol yozdirib qo‘ygan.