O‘zbekistonda xizmat ko‘rsatgan artist Toir Qo‘ziyevning musiqiy asaridan muallifning roziligisiz foydalangan Toshkentdagi mashhur restoran jarimaga tortildi. Bu haqda “Daryo”ga O‘zbekiston mualliflik va turdosh huquqlarni himoya qilish jamiyati matbuot xizmati xabar bermoqda.

2022-yil 4-mart kuni bo‘lib o‘tgan fuqarolik ishlari bo‘yicha Mirobod tumanlararo sudida O‘zbekiston Respublikasi mualliflik va turdosh huquqlarni himoya qilish jamiyati “UzAvtor” tomonidan O‘zbekiston Respublikasida xizmat ko‘rsatgan artist Qo‘ziyev Toir Asqarovich manfaatlari yuzasidan kiritilgan da’vo arizasi ko‘rib chiqildi.

Ushbu kiritilgan da’vo arizasining o‘ziga xos jihati shundan iboratki, “UzAvtor” tomonidan mamlakatimizda ilk marotaba muallifning ruxsatisiz uning asaridan foydalanganlik uchun restoran sudga berildi.

Ya’ni muallif Toir Qo‘ziyevning “Cumite” nomli musiqiy asaridan uning roziligini olmasdan foydalangan Toshkentdagi mashhur restoranlardan biriga nisbatan sudning hal qiluv qarori o‘qib eshittirildi.

Hal qiluv qarorida javobgarga (nomini oshkor qilmasligimizni iltimos qilgan) nisbatan O‘zbekiston Respublikasining “Mualliflik huquqi va turdosh huquqlar to‘g‘risida”gi qonuniga binoan muallif Qo‘ziyev Toir Asqarovich foydasiga tegishli (yoki 5 million so‘m) tovon pulini (boy berilgan foyda) to‘lab berish majburiyati yuklatildi.