23-mart kuni Toshkent shahrining Mirobod tumanida sodir bo‘lgan yo‘l-transport hodisasi oqibatida bir kishi halok bo‘ldi, deb xabar beradi poytaxt IIBB axborot xizmati.
Ma’lum qilinishicha, Taras Shevchenko—Fidokor ko‘chalari kesishmasida 25 yoshli haydovchi S.Z. Spark avtomashinasini boshqarib ketayotib, dastlabki ma’lumotlarga ko‘ra, svetoforning qizil chirog‘ida harakatlangan va svetoforning yashil chirog‘ida harakatlanib kelayotgan 24 yoshli G.M. boshqaruvidagi Malibu bilan to‘qnashuv sodir etib, yo‘l chetidagi daraxtga urilgan.
Malibu avtomobili esa qarama-qarshi yo‘nalishga o‘tib ketib, o‘z yo‘nalishda harakatlanib kelayotgan, haydovchi 29 yoshli R.D. boshqaruvidagi Cobalt bilan to‘qnashgan.
To‘qnashuv oqibatida Spark avtomashinasining haydovchisi S.Z. hamda birinchi yo‘lovchisi U.Yu. turli xil tan jarohatlari bilan kasalxonaga yotqizilgan. Spark avtomashinasining ikkinchi yo‘lovchisi esa ko‘rsatilgan tibbiy yordamlarga qaramay kasalxonada vafot etgan.
Mazkur holat yuzasidan Toshkent shahar IIBB huzuridagi Tergov boshqarmasi tomonidan Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) 2-qismi bilan jinoyat ishi qo‘zg‘atilgan. Hozirda tergov harakatlari olib borilmoqda.
Avvalroq Toshkentda Nexia piyodalar o‘tish joyidan kesib o‘tayotgan ikki qizni urib yuborgani, Farg‘onada avtobusni quvib o‘tishga uringan Nexia Isuzu bilan to‘qnashishi oqibatida yengil mashina haydovchisi vafot etgani, Qashqadaryoda Lacetti va Nexia ishtirokidagi YTHda 4 kishi halok bo‘lgani to‘g‘risida xabar berilgandi.
Izoh (0)