O‘zbekistonliklarning mikroqarzlar bo‘yicha qarzi 10 trln so‘mga yaqinlashdi. Markaziy bank vaziyatni izohladi

O‘zbekistonliklarga ajratilgan mikroqarzlar bo‘yicha qoldiqlar 10 trln so‘mga yaqinlashib qoldi. Bu haqda Markaziy bank sharhidan ma’lum bo‘ldi.

Jismoniy shaxslarga ajratilgan kreditlarning turlari bo‘yicha, YIMga nisbatan ipoteka kreditlari ko‘rsatkichlari yuqori bo‘ldi.

2021-yilda jismoniy shaxslarga ajratilgan kreditlarning YIMga nisbati oldingi o‘sish trendidan so‘ng bir maromda shakllanib, kredit turlari orasida tarkibiy o‘zgarishlar kuzatildi:

Xususan, uy-joy qurilishining jadallashuvi, ipoteka bozorining rivojlanayotganligi, aholi sonining tabiiy o‘sishi hamda aholi tomonidan uy-joyga bo‘lgan kechiktirilgan talabning qondirilishi, jismoniy shaxslarga ajratilayotgan ipoteka kreditlarining tez sur’atlarda o‘sishiga omil bo’lmoqda.

Shuningdek, aholi tomonidan olinayotgan mikroqarzlar qoldig‘ining o‘sishini moliyaviy qarzlarni naqd pul, bank kartalari yoki mobil ilovalari orqali osonlashtirilgan ravishda olish imkoniyatlarining kengayishi hamda ommabopligining oshishi bilan izohlash mumkin, — deyiladi izohda.

Bundan tashqari, so‘nggi yillarda chakana savdo do‘konlari tomonidan turli xil iste’mol mahsulotlarini muddatli to‘lov asosida sotish amaliyotining ommalashayotganligiga banklarning iste’mol kreditlari hajmida deyarli o‘zgarish bo‘lmaganligining asosiy sabablaridan biri sifatida qarash mumkin.

Avvalroq O‘zbekistonda avtokreditlar qimmatlashgani haqida xabar berilgan edi.