Hujumchi Paulo Dibala “Yuventus”ni tark etishga yaqin turibdi.
Sky Sport Italia nashriga ko‘ra, 21-mart kuni 28 yoshli hujumchining agenti va klub rahbariyati o‘rtasida uchrashuv bo‘lib o‘tgan. Tomonlar unda argentinalik futbolchining yangi bitimi shartlarini muhokama qilgan va kelisha olmagan.
Shu tariqa hamma narsa yozda shartnomasi tugaydigan Dibalaning mavsum yakunida Turin klubini erkin agent sifatida tark etishiga qarab ketmoqda.
Ayni damda futbolchiga asosiy da’vogar “Inter” hisoblanadi. Shuningdek, unga “Atletiko” ham qiziqish bildirmoqda. Avvalroq, “Liverpul” va “Manchester Siti”ning Pauloni tekinga qo‘lga kiritmoqchi ekanligi to‘g‘risida xabarlar yangragandi.
Ma’lumot uchun, Dibala 2015-yilning yozida “Palermo”dan 41 million yevro evaziga turinliklar safiga o‘tgan. 2021/22-yilgi mavsumda u Italiya A Seriyasida 21 o‘yin o‘tkazib, 8 ta gol va 5 ta golli uzatmaga mualliflik qildi. Bundan tashqari, Chempionlar Ligasida ham o‘z nomiga 3 ta gol va bitta golli uzatma yozdirib qo‘ygan.
Transfermarkt portali argentinalik hujumchining transfer narxini 40 million yevroga baholagan.
Izoh (0)