O‘zbekiston fuqarolarining 50 nafariga Fransiyada bepul o‘qish imkoniyati beriladi

O‘zbekiston yoshlari Fransiya oliy ta’lim muassasalarida bepul o‘qish imkoniyatiga ega bo‘ldi. Ushbu mamlakat elchixonasi bakalavr, magistratura va doktoranturada o‘qish uchun O‘zbekistonda grant ajratdi, deb xabar beradi “El-yurt umidi” jamg‘armasi.

Fransiya elchixonasi, Campus France va “El-yurt umidi” jamg‘armasi o‘rtasidagi qo‘shma grantlarni moliyalashtirish uchun 50 o‘ringa mo‘ljallangan ochiq stipendiya tanlovlarini e’lon qildi. Shuningdek, “Yangi O‘zbekistonning 2022–2026-yillarga mo‘ljallangan taraqqiyot strategiyasi” loyihasida “El-yurt umidi” jamg‘armasi orqali erkin va ijodiy fikrlaydigan yoshlarni nufuzli xorijiy oliygohlarga o‘qishga yuborish ko‘lamini 2 baravarga oshirish taklifi ilgari surilmoqda.

“El-yurt umidi” jamg‘armasi O‘zbekiston uchun eng ustuvor sohalar, jumladan:

• Neft va gaz, elektr energiyasi, qayta tiklanadigan energiya, geologiya va konchilik;
• Yadro muhandisligi, elektrotexnika, aerokosmik muhandislik va fuqaro aviatsiyasi;
• Avtomobilsozlik;
• Axborot texnologiyalari va sun’iy intellekt;
• Suv va ekologiya muhandisligi, agronomiya;
• Gumanitar fanlar, chet tillari;
• Madaniyat, turizm va sport, kinematografiya, madaniy meros va muzeyshunoslik, moda;
• Arxitektura va dizayn;
• Iqtisodiyot va menejment, huquq, jurnalistika, davlat boshqaruvi;
• Sog‘liqni saqlash va farmatsevtika.

Ushbu sohalarda o‘qishni davom ettirish uchun qo‘shma grantlarni moliyalashtirish uchun 50 o‘ringa mo‘ljallangan ochiq stipendiya tanlovlarini e’lon qilinadi.

“El-yurt umidi” jamg‘armasi 2022—2023-o‘quv yili uchun eng nufuzli xorijiy davlatlarda:

• bakalavriat ta’lim dasturi uchun 10 nafar,
• magistratura ta’lim dasturi uchun 30 nafar,
• doktorantura ta’lim dasturi uchun 10 nafar stipendiyalar ajratishini ma’lum qiladi.

Tanlovda ishtirok etish uchun arizalar “El-yurt umidi” jamg‘armasining onlayn platformasi orqali elektron shaklda topshiriladi. Hujjatlar 2022-yilning 15-martdan 15-mayga qadar davom etadi. Nomzodlarning o‘zbek, fransuz va ingliz tillarini bilish darajasini baholash “El-yurt umidi” jamg‘armasi va Campus France’ning tegishli mutaxassislari tomonidan amalga oshiriladi. Tegishli xorijiy tillarni bilish darajasi CEFR B2.

Grant sohiblarini tanlashda ikki asosiy yo‘nalish bo‘yicha 2022-yilning may—iyun oylarida suhbat o‘tkaziladi: motivatsiya va mutaxassislik bo‘yicha bilim darajasi. O‘qish sentabr oyidan boshlanadi.

Saralash tanloviga oid barcha ma’lumotlarni “El-yurt umidi” jamg‘armasining “Eyuf.uz” sayti orqali bilib olish mumkin. Nomzodlar uchun barcha zarur ma’lumotlar jamg‘armaning Onlayn hujjat topshirish platformasida batafsil yoritib berilgan.

Avvalroq xorijiy OTMlarga bakalavriat uchun – 50 nafar, magistratura uchun – 10 nafar xotin-qizlarga har yili “El-yurt umidi” jamg‘armasi orqali qo‘shimcha grantlar ajratilishi to‘g‘risida xabar berilgandi.