Ukrainadagi urush davomida 115 nafar bola halok bo‘ldi

Rossiyaning Ukrainaga bosqini boshlangandan buyon harbiy harakatlar oqibatida 115 nafar ukrainalik bola halok bo‘ldi, yana 140 nafari yaralandi. Bu haqda Ukraina Bosh prokuraturasiga tayanib, Meduza xabar berdi.

BMT ma’lumotlariga ko‘ra, Ukrainadagi urush paytida 847 nafar tinch aholi halok bo‘lgan, 1399 kishi jarohatlangan. Tashkilotning qayd etishicha, asl ko‘rsatkichlar bundan ancha yuqori bo‘lishi mumkin.

Xarkov viloyati harbiy ma’muriyati rahbari Oleg Sinegubovning ma’lum qilishicha, 20-martga o‘tar kechasi Xarkov sanoat okrugining o‘qqa tutilishi natijasida bir erkak va to‘qqiz yoshli bola halok bo‘lgan. Mahalliy politsiya boshlig‘i yordamchisi Vyacheslav Markov besh nafar tinch aholining o‘limi haqida xabar bermoqda.

Shuningdek, Mariupol shahar kengashi 19-mart kuni Rossiya qo‘shinlari shaharning Levoberejniy tumanidagi 12-san’at maktabiga aviazarba bergani haqida xabar qilmoqda. 

Otishma vaqtida binoda 400 ga yaqin tinch aholi, asosan ayollar, bolalar va qariyalar yashiringan edi. Mahalliy hokimiyat ma’lumotlariga ko‘ra, bino vayron bo‘lgan, tinch aholi esa vayronalar ostida qolmoqda. Halok bo‘lganlar haqida ma’lumot hozircha yo‘q.

Mariupol mart oyi boshidan beri rus armiyasi tomonidan qamalda. Avvalroq shaharda tinch aholi boshpana qilgan mahalliy tug‘ruqxona va drama teatri o‘qqa tutilgan edi.