Samarqandda xususiy bog‘cha tarbiyachisi bolalarni igna tiqib qo‘rqitib kelgani aytilmoqda (video)

Ijtimoiy tarmoqlarda Samarqand shahridagi maktabgacha ta’lim tashkilotlaridan birida tarbiyachi bolalarni qo‘rqitish uchun igna tiqib azoblab kelgani haqida xabarlar tarqaldi. Samarqand viloyati Ichki ishlar boshqarmasi holatga munosabat bildirdi.

Aytilishicha, holat shahardagi Golden kids xususiy bog‘chasida sodir bo‘lgan. Bolalarni uxlatish va gapini o‘tkazish uchun bog‘cha tarbiyachisi ularga igna tiqib qo‘rqitib kelgan.

“Hozirda tarqalgan ma’lumot viloyat IIB tomonidan o‘rganilmoqda. Natijasi bo‘yicha ma’lumot beriladi”, — deyiladi xabarda.

Samarqand viloyati Maktabgacha ta’lim boshqarmasi ham holatga munosabat bildirib, o‘rganish ishlari olib borilayotganini, batafsil ma’lumot berilishini ma’lum qildi.