Samarqand viloyati Paxtachi tumanida tarkibida oltin moddasi bo‘lgan ruda toshlarni noqonuniy qazib olish bilan shug‘ullanuvchi jinoiy guruh faoliyatiga chek qo‘yildi. Bu haqda viloyat Ichki ishlar boshqarmasi xabar qildi.
Qayd etilishicha, Davlat xavfsizlik xizmati Samarqand viloyati boshqarmasi hamda Paxtachi tumani IIB xodimlari bilan hamkorlikda tezkor tadbir o‘tkazilgan. Tadbir davomida tarkibida oltin moddasi bo‘lgan ruda toshlarni noqonuniy qazib olish bilan shug‘ullanuvchi jinoiy guruh a’zolari faoliyatiga chek qo‘yilgan.
Xususan, Paxtachi tumanida yashovchi fuqarolar M.X. (1974-yilda tug‘ilgan), X.U. (1985-yilda tug‘ilgan) yashash xonadonlarida tarkibida oltin moddasi bo‘lgan taxminan 920 kilogramm ruda toshlar hamda boshqa ashyoviy dalillar (4 ta tosh tegirmon, 2 ta drabelka) mavjudligi aniqlanib, hujjatlar rasmiylashtirilgan.
Ushbu rudalarni qayta ishlash oqibatida 339 million so‘mdan ortiq tabiiy gaz va elektr energiyasi talon-toroj qilingan.
Hozirda jinoiy guruh a’zolariga nisbatan Jinoyat kodeksining tegishli moddalari bilan jinoyat ishi qo‘zg‘atish rejalashtirilib, surishtiruv harakatlari olib borilmoqda.
Eslatib o‘tamiz, 16-mart kuni Samarqand viloyatining Paxtachi tumanida bir guruh shaxslarning tarkibida oltin moddasi bo‘lgan rudalarni noqonuniy tarzda qayta ishlash holatiga chek qo‘yilgandi. Uch nafar fuqaroning yashash xonadonlari ko‘zdan kechirilganda ulardan sof oltin moddasi bo‘lgan, taxminan, 3,8 tonna ruda toshlar hamda uchta tosh tegirmoni, ikkita oltin rudasini tozalashga mo‘ljallangan “moyka” uskunalari topilgan.
Izoh (0)