Kal Maykl Jekson, yetim Merilin Monro — mashhurlar haqida siz bilmagan faktlar

Mashhur insonlarni millionlab muxlislar kuzatadi. Ularni kumirlari hayotidagi eng kichik tafsilotlar ham qiziqtiradi: qayerda yashaydi, kim bilan do‘st va munosabatlarni qanday quradi. Ammo hali ham yulduzlar haqida siz bilmagan faktlar talaygina.

Maykl Jekson sochi yo‘q joyini tatuaj va ulama soch bilan yashirgan

Jekson 1984-yilda reklama roligini suratga olish paytidagi baxtsiz hodisadan keyin parik kiyishni boshlagan. Gap shundaki, mushakbozlik vaqtida uning sochiga uchqun teggan. Natijada qo‘shiqchi qattiq kuygan, ba’zi ma’lumotlarga ko‘ra, qisman kal ham bo‘lib qolgan.

Ulama sochdan tashqari, Maykl tatuaj qilish orqali ham sochi yo‘q joylarini yashirgan.

Xuddi shu sababga ko‘ra Shon Konneri ham ishtirokidagi Jeyms Bond filmining barcha qismlarida ulama sochdan foydalangan.

Aktyor 21 yoshida kal bo‘la boshlagan. Shuning uchun Bondning 1-filmidan boshlab u sun’iy soch qoplamasidan foydalangan.

Merilin Monro yetimman deb hammaga yolg‘on gapirgan

Aktrisa bolaligining ko‘p qismini boqib olgan oilalarda va bolalar uyida o‘tkazgan. Monroning onasi ruhiy kasallikdan aziyat chekkan, otasini esa umuman ko‘rmagan. Yetim qiz obrazi aktrisasining kinodagi karyerasiga katta yordam berishi mumkin edi va u shunday yo‘l tutdi.

Kino biznesiga ilk qadamlarini qo‘yayotgan Merilin agentlarning taklifiga binoan ota-onasi yo‘qligi haqidagi hikoyani o‘ylab topgan. Haqiqat yuzaga chiqqanda esa aktrisa OAVga to‘g‘risini aytishga majbur bo‘lgan.

Uitni Xyuston Robert De Nironi rad etgan

Xonanda har doim erkaklar e’tibori markazida bo‘lgan va unga maftun bo‘lganlarning ko‘pi mashhur odamlar edi. Ular orasida Robert De Niro ham bo‘lgan. Aktyor tom ma’noda aktrisani ta’qib qilib, uni uchrashuvlarga taklif qilardi. Ammo Xyuston o‘z so‘zida qat’iy turib, uni rad qilgan.

Selin Dionning g‘alati odati bor

Har bir artistning sahnaga chiqish oldidan hayajonini yengishga yordam beradigan o‘ziga xos odati bo‘ladi. Selin Dion ham bundan mustasno emas. Xonanda har oqshom sahnaga chiqishdan oldin marhum eri Rene Anjelil qo‘lining bronza nusxasini silkitib, u bilan daraxtni taqillatadi.

Bryus Uillis “Armageddon” va “Oltinchi his” filmlarida qarzlaridan qutulish uchun suratga tushgan

90-yillarning oxirlarida Bryus Uillis ishtirokidagi “Brodveylik janjalkash” katta budjetli romantik komediyasi chiqarilishi kerak edi. Biroq suratga olish ishlari boshlanganidan 20 kun o‘tib, jarayon to‘xtatildi, ijodiy guruhning asosiy a’zolari ishdan bo‘shatildi. Ma’lum bo‘lishicha, bunga Uillisning og‘ir xarakteri sababchi bo‘lgan.

Budjetning katta qismi sarflangani uchun Bryus katta mashmashaga duch keladi. Walt Disney Company xarajatining o‘rnini qoplash uchun aktyor juda kam haq evaziga navbatdagi 3 ta filmda suratga tushishga rozi bo‘lgan. Bu filmlar “Armageddon”, “Oltinchi his” va “Kichkintoy” filmlari edi.

Jorj Kluni Nikol Kidman bilan 2 marta garov o‘rnab, ikkalasida ham yutgan

Jorj Kluni oila qurmasligiga shunchalik amin ediki, Nikol Kidman bilan katta pul evaziga garov o‘ynagan. 2001-yilda 40 yoshga to‘lgan aktyor hali ham uylanmagan edi. Kidman garov shartiga ko‘ra uning yubileyiga chek yuboradi.

Ammo aktyor pulni qaytarib, garov pulini ikki barobarga oshirgan va 50 yoshgacha farzandli bo‘lmaslik sharti bilan yana garov o‘ynaydi. Pullarni ikkinchi marta ham Kluni yutadi: aktyor 56 yoshidagina egizak qizlar — Ella va Aleksandraning otasi bo‘ldi.

Marlon Brando ikkita “Oskar”ini yo‘qotgan, matn yodlashni ham yomon ko‘rgan

Aktyorning so‘zlariga ko‘ra, 1954-yilda “Sohil bo‘yida” filmidagi ishi uchun unga berilgan birinchi “Oskar” qayerdadir yo‘qolib qolgan. Uning o‘rniga aktrisa Sachin Littlfezer qabul qilgan ikkinchi haykalcha haqida u shunday deydi: “Akademiya uni menga yuborgan bo‘lishi mumkin. Lekin hozir qayerdaligini bilmayman”.

Aktyorga tegishli yana bir qiziq tafsilot: u replikalarini yod olishni yoqtirmagan. Buning o‘rniga, Brando yordamchilar unga ko‘rsatib turadigan so‘zlar yozilgan kartochkalardan foydalangan.

Matnli varaqlar hamma yerga joylashtirilgan: devorlarga yopishtirilgan, hamkasblari kiyimiga ilib qo‘ygan. Hatto shu darajaga yetganki, “Cho‘qintirgan ota” filmini suratga olish chog‘ida Brando satrlarni Robert Dyuvalning ko‘kragidan o‘qigan.