Toshkent shahri Yashnobod tumanida 18-mart kuni Latviya—O‘zbekiston qo‘shma korxonasida yong‘in yuzaga kelgani to‘g‘risida xabar berilgandi. FVV matbuot xizmatining ma’lum qilishicha, yong‘in oradan qariyb 7 soat o‘tgach o‘chirilgan.
18-mart kuni soat 20:45 da Toshkent shahar Yashnobod tumani Farg‘ona yo‘li ko‘chasida joylashgan “Oriyent logistik sentr” qo‘shma korxonasi hududida joylashgan mator moy mahsulotlari (bochkalarda) omborida yong‘in sodir bo‘layotgani to‘g‘risida shahar FVBga xabar kelib tushgan.
Shunga ko‘ra 10 ta yong‘in-qutqaruv ekipaji, 3 ta maxsus va 2 ta yordamchi texnikalar zudlik bilan voqea joyiga yetib borib, yong‘in soat 21:49 da qurshab olingan va 19-mart kuni soat 03:30 da bartaraf etilgan.
Yong‘in natijasida omborxonaning taxminan 2000 kvadrat metr maydonida moy mahsulotlari yonib zararlangan.
“Hodisa oqibatida tan jarohati olgan va halok bo‘lganlar yo‘q. Hozirda yong‘inning kelib chiqish sababi va keltirilgan moddiy zarar miqdori aniqlanmoqda”, — deyiladi xabarda.
Avvalroq Namangandagi “Chorsu” dehqon bozorida yong‘in yuz bergani, Toshkentdagi xonadonda telefon quvvatlash moslamasidan yong‘in chiqqani, Oltiariqdagi massajxonada yong‘in sodir bo‘lgani to‘g‘risida xabar berilgandi.
Izoh (0)