AQSH Ukraina hududida sodir bo‘layotgan mojaroda ishtirok etish yoki ushbu mamlakat uzra parvozlar taqiqlanuvchi zona rejimini joriy etish niyatida emas. Bu haqda Pentagon rahbari Lloyd Ostin CNN telekanaliga bergan intervyusida ma’lum qildi.
“AQSH prezidenti Jo Bayden qo‘shinlarimiz Ukrainada Rossiyaga qarshi jangovar harakatlarda ishtirok etmasligini aniq aytib o‘tdi”, — deydi mudofaa idorasi rahbari.
Ostin Ukraina uzra parvozlarni taqiqlovchi hudud tashkil etilsa, AQSH uning osmonini nazorat qilishga va Rossiya samolyotlarini urishga majbur bo‘lishini eslatgan.
“Bu biz Rossiya bilan urushayotganimizni anglatadi. Yadroviy qurollarga ega ikki mamlakat o‘rtasidagi mojaroni hech kim ko‘rishni istamaydi. Bu mintaqa uchun yomon. Bu butun dunyo uchun yomon”, — deya ta’kidlaydi Pentagon rahbari.
Uning qo‘shimcha qilishicha, AQSH Ukrainaga yordam ko‘rsatishga e’tibor qaratadi va “NATO hududining har bir dyuymnini himoya qilish uchun” barcha imkoniyatlarini ishga soladi.
Ukraina uzra parvozlarni taqiqlash zonasini yaratishni mamlakat prezidenti Vladimir Zelenskiy so‘ragan, biroq G‘arb davlatlari rahbarlari ushbu tashabbusni rad etgan, chunki u jahon urushini keltirib chiqarishi mumkin. Keyinroq Zelenskiy buning o‘rniga Ukrainaga C-300 havo hujumidan mudofaa tizimlarini berishni so‘rab chiqqan.
Avvalroq AQSH prezidenti Jo Bayden Ukrainaga 13,6 milliard dollar ajratish haqidagi qonunni imzolagan, Polsha bosh vazir o‘rinbosari Ukrainaga NATOning tinchlikparvar kuchlarini yuborishni taklif qilgan edi.
Rossiya—Ukraina urushiga oid tezkor, ishonchli yangiliklar va ma’lumotlarni “Daryo”ning Live sahifasi orqali kuzatib boring → @Daryo_Live
Izoh (0)