Toshkent viloyatida prezidentning maxsus farmoni bilan ajratilgan yerni 800 ming dollarga sotishga uringan shaxslar ushlandi, deb xabar beradi O‘zA.
Ma’lum qilinishicha, Toshkent viloyatida yashovchi ikki shaxs (1964 va 1970-yillarda tug‘ilgan) tadbirkorlik bilan shug‘ullanmoqchi bo‘lgan fuqaroning ishonchiga kirib, o‘zlariga tegishli bo‘lmagan 4 gektar yerni unga 800 ming dollarga sotishga kelishgan. Ular oldindan 100 ming dollar olgan vaqtlarida Davlat xavfsizlik xizmati va Iqtisodiy jinoyatlarga qarshi kurashish departamentining hududiy boshqarmalari xodimlari tomonidan ushlangan.
Ta’kidlanishicha, mazkur yer maydoni prezident farmoniga muvofiq, 2021-yil mahalliy MChJga investitsiya kiritish sharti asosida ko‘p qavatli turar-joylar, kottejlar hamda madaniy va maishiy xizmat ko‘rsatish shoxobchalari qurish uchun Bo‘stonliq tumani hududidan ajratib berilgan.
Avvalroq Andijon va Xorazm viloyatlarida fuqarolarga yer olib berish uchun jami 17,2 ming dollar olgan shaxslar ushlangani, Buxoroda o‘g‘lining nomidagi 7,4 gektar yerni noqonuniy ravishda 84 ming dollarga sotishga uringan shaxs qo‘lga olingani, Toshkent tumanida hokimlik zaxirasidan 14 sotix yerni 8 ming dollar evaziga olib berishni va’da qilgan shaxs ushlangani to‘g‘risida xabar berilgandi.
Mavzuga doir:
- Toshkent viloyatida ijaradagi 30 sotix yerni qariyb 340 mln so‘mga sotgan shaxslar ushlandi
- Samarqandda o‘rmon xo‘jaligiga tegishli 4 gektar yerni 30 ming dollarga sotishga uringan advokat ushlandi
- Toshkent viloyatida 13,7 gektar yerni 3,4 mln dollarga sotmoqchi bo‘lgan investitsiyalar va tashqi savdo boshqarmasi xodimi ushlandi
Izoh (0)