Toshkentdagi “O‘zbekiston” xalqaro anjumanlar saroyida Shavkat Mirziyoyevning sog‘liqni saqlash sohasi vakillari bilan “O‘zbekiston tibbiyoti — inson qadri uchun” mavzusidagi ochiq muloqoti bo‘lib o‘tmoqda. Muloqot davomida davlat rahbari tez tibbiy yordam xizmati respublika, viloyat, shahar va tuman darajasida yagona boshqaruv tizimiga birlashtirilishini ma’lum qildi, deb xabar beradi “Daryo” muxbiri.
Prezident kelgusi besh yilda dori-darmon va tibbiyot vositalari ishlab chiqarish hajmi 3 baravarga oshirilib, mahalliy dori vositalari bilan ta’minlash darajasi 80 foizga yetkazilishin ma’lum qilgan.
“Bu maqsadlarga erishish uchun, milliy farmatsevtika tarmog‘i har tomonlama qo‘llab-quvvatlanadi. Jumladan, mahalliy korxonalar uchun, yangi dori vositalarini qayta-qayta davlat ro‘yxatidan o‘tkazishga bo‘lgan talab bekor qilinadi. Endi xalqaro standartga ega korxonalarga mahsulotlarning har bir seriyasini majburiy sertifikatlash talab etilmaydi. O‘zimizda ishlab chiqarilayotgan yangi turdagi ijtimoiy muhim dorilarni 3 yil davomida kafolatli xarid qilish tizimi yo‘lga qo‘yiladi. Farmatsevtika korxonalari uchun, texnologik va laboratoriya uskunalari, butlovchi qismlar importi uchun bojxona bojlari bo‘yicha imtiyozlar yana uch yilga uzaytiriladi”, — deydi Shavkat Mirziyoyev.
Prezidentning ma’lum qilishicha, 2022-yilda:
- samarasi isbotlangan dorivor o‘simliklar tibbiy yordam ko‘rsatish standartlari va protokollariga bosqichma-bosqich kiritiladi;
- barcha tibbiyot oliygohlari va texnikumlarda, hududiy Xalq tabobati markazlarida soha uchun mutaxassislar tayyorlash, qayta tayyorlash va malakasini oshirish tizimi joriy qilinadi;
- barcha hududlarda Ibn Sino markazlari tashkil etilib, ular tomonidan maktab, litsey, kollej, texnikum va oliygohlarda xalq tabobati va sog‘lom turmush tarzini o‘qitish yo‘lga qo‘yiladi;
- har bir poliklinikada xalq tabobati xonalari, fitobarlar tashkil etiladi;
- dorixonalarda dorivor vositalar burchagi bo‘lishi, litsenziya talabi sifatida kiritiladi;
- Tibbiyot akademiyasining klinikasi qoshida Respublika xalq tabobati ilmiy-amaliy markazining 40 o‘rinli davolash bo‘limi va hududlarda filiallari ish boshlaydi.
“Eng avvalo, ‘103’ tez tibbiy yordam xizmati respublika, viloyat, shahar va tuman darajasida yagona boshqaruv tizimiga birlashtiriladi. Endi Toshkent shahri tajribasi asosida, har bir viloyatda tez tibbiy yordam bo‘yicha elektron avtomatlashgan boshqaruv tizimi joriy qilinadi. Yangi tashkil etiladigan dispetcherlik markazlari chaqiruvlarni bemorning ahvoli, kasallik turi va darajasiga qarab saralaydi hamda shunga asosan tegishli tibbiy brigadalarni yo‘naltiradi. Bundan buyon, tez yordam tuman yoki viloyat chegarasiga qarab emas, balki bemorgacha masofaning yaqinligiga qarab xizmat ko‘rsatadi. Shuningdek, tuman markazidan 60—80 kilometr uzoqlikda joylashgan 24 ta aholi punktida alohida tibbiy yordam brigadalari tashkil etiladi”, — deydi davlat rahbari.
“2022–2025-yillarda tez tibbiy yordam tizimidagi barcha Damas va boshqa eskirgan mashinalar zamonaviy avtomobillarga almashtiriladi. Xususan, 2022-yilda 890 ta, 2023-yildan boshlab esa har yili 450 tadan yangi avtomobil, jumladan, reanimatsiya mashinalari olib beriladi. Natijada kelgusi uch yilda tez tibbiy yordam avtoparki to‘liq yangilanadi. Bu maqsadlar uchun, 65 million dollar jalb qilinadi. Ushbu choralar evaziga tez tibbiy yordamda chaqiruvlarga yetib borish vaqti 3 barobarga qisqaradi (30 daqiqadan 10 daqiqaga tushadi)”, — deydi davlat rahbari.
Eslatib o‘tamiz prezidentning 2021-yil 27-maydagi tegishli qaroriga binoan tez tibbiy yordam xizmati uchun yangi va zamonaviy rusumdagi tez tibbiy yordam avtomashinalarini xarid qilish belgilangandi. Shunga muvofiq, vazirlik hamda Jizzax avtomobil zavodi o‘rtasida tez tibbiy yordam mashinalarini yetkazib berish bo‘yicha shartnoma imzolangan.
Izoh (0)