“Oilaviy poliklinikalarda ish vaqti soat 20:00 gacha uzaytiriladi. Ularda ishlaydigan xodimlarga qo‘shimcha ustama to‘lanadi” — Shavkat Mirziyoyev

Toshkentdagi “O‘zbekiston” xalqaro anjumanlar saroyida Shavkat Mirziyoyevning sog‘liqni saqlash sohasi vakillari bilan “O‘zbekiston tibbiyoti — inson qadri uchun” mavzusidagi ochiq muloqoti bo‘lib o‘tmoqda, deb xabar bermoqda “Daryo” muxbiri.

Muloqot davomida prezident har yili ikki mingdan ziyod malakali shifokorlar pensiyaga chiqishini aytgan. Uning so‘zlariga ko‘ra, kelib tushgan murojaatlarda ularning 60 foizi o‘z faoliyatini davom ettirish istagini bildirgan.

“Birlamchi tizim qamrovini kengaytirish va yuklamani kamaytirish maqsadida, biz endilikda bunday tajribali shifokorlarning yakka tartibdagi oilaviy shifokorlik faoliyatini yuritishiga ruxsat beramiz. Buning uchun alohida klinika ochish talab etilmaydi, balki bu toifadagi shifokorlar o‘z uyida yoki ijaraga olingan binoda tibbiy xizmatlar ko‘rsatishi mumkin bo‘ladi. Yakka tartibdagi oilaviy shifokorlarga, aholiga bepul ko‘rsatilayotgan xizmatlari uchun to‘lov bosqichma-bosqich Davlat tibbiy sug‘urta jamg‘armasi orqali beriladi.

Ushbu tajribani dastlab Sirdaryo viloyatida boshlaymiz. Keyinchalik zarur tayyorgarlikni ko‘rib, bosqichma-bosqich barcha hududlarda joriy etiladi”, — deydi Shavkat Mirziyoyev.

Shuningdek, davlat rahbari oilaviy shifokor punktlari, oilaviy va ko‘p tarmoqli poliklinikalarda statsionar tibbiy xizmatlar kunduzi soat 13:00 ga qadar ishlashini ma’lum qilgan.

Bundan tashqari, prezident 2022-yil 1-maydan boshlab quyidagi o‘zgarishlar bo‘lishini ma’lum qilgan:

• barcha ko‘p tarmoqli markaziy poliklinikalarda bolalar bo‘limi tashkil etiladi;
• 17 mingdan ziyod tibbiyot brigadalariga yana qo‘shimcha 8,5 mingta bolalar hamshirasi va doya (akusher) shtatlari beriladi. Ular onalarga bolalarning sog‘lom bo‘lib dunyoga kelishidan tortib, voyaga yetguniga qadar, to‘g‘ri parvarish qilishni o‘rgatadi;
• bolalar uchun profilaktik ko‘riklar dasturi qayta ko‘rib chiqilib, 18 yoshgacha bo‘lgan bolalarni pediatr, stomatolog, endokrinolog, ortoped kabi eng zarur mutaxassislar tomonidan manzilli ko‘rikdan o‘tkazish tizimi joriy qilinadi.

“Ma’lumki, 2021-yildan bolalar uchun ovqatni boyitadigan qo‘shimchalar, vitamin A va gijjaga qarshi antigelmint preparatlarni bepul berish yo‘lga qo‘yildi. Ushbu ishlarni davom ettirgan holda, 2022-yil 1-iyuldan boshlab, 3—15 yoshli bolalarga yod preparatlari davlat tomonidan bepul tarqatiladi. Bu orqali kelgusi besh yilda bolalarda buqoq, kamqonlik kasalliklarini 30 foizga kamaytirishga, ularning aqliy va jismoniy sog‘lom rivojlanishi uchun katta asos yaratiladi. Bu maqsadlar uchun, joriy yilda 60 milliard so‘m yo‘naltiramiz”, — deydi Shavkat Mirziyoyev.

Avvalroq Shavkat Mirziyoyev sog‘liqni saqlash sohasidagi hisob-kitobni joyiga qo‘yish kerakligi haqida gapirgani to‘g‘risida xabar berilgandi. Davlat rahbarining ta’kidlashicha, sohada transformatsiya jarayoni ketmoqda.