Markaziy bank: Bizda so‘mning almashuv kursi bo‘yicha maqsadli ko‘rsatkich yo‘q. Asosiy maqsadimiz — inflyatsiya

Avvalroq O‘zbekistonda dollarning rasmiy kursi 11 500 so‘mdan oshgani haqida xabar berilgan edi.

Markaziy bank raisi Mamarizo Nurmuratovning so‘zlariga ko‘ra, bugungi kunda valyuta kurslari bozor tamoyillari, ya’ni talab va taklif asosida shakllanadi.

Markaziy bank boshqariladigan valyuta kursidan erkin suzuvchi valyuta kursiga uzoq va qiyin o‘tishni boshdan kechirdi va valyuta kursini emas, balki inflyatsiyani asosiy maqsadi deb biladi.

Bizda so‘mning almashuv kursi bo‘yicha maqsadli ko‘rsatkich yo‘q. Shu bois Markaziy bank neytrallik tamoyili asosida valyuta intervensiyalari siyosatini davom ettiradi, — dedi Mamarizo Nurmuratov.

Ayrim hollarda Markaziy bank tashqi xatarlarning salbiy ta’sirini minimallashtirish uchun intervensiyalar hajmini oshirishi mumkin.

Markaziy bankning ushbu choralari makroiqtisodiy va moliyaviy barqarorlikni ta’minlashga va shu orqali uzoq muddatli inklyuziv iqtisodiy o‘sishga erishishga xizmat qiladi.

Avvalroq Mamarizo Nurmuratov O‘zbekistonda dollar kursi keskin oshib ketganiga izoh bergan edi.