Xalq deputatlari To‘raqo‘rg‘on tuman kengashining navbatdan tashqari sessiyasi bo‘lib o‘tdi. Bu haqda “Daryo” muxbiri Azizbek Abduvaliyev xabar bermoqda.
Sessiyada tashkiliy masala ko‘rildi. Viloyat hokimi Shavkat Abdurazzaqov tuman hokimligiga shu paytga qadar Namangan viloyat hokimining o‘rinbosari — Mahalla va oilani qo‘llab-quvvatlash boshqarmasi boshlig‘i vazifasida ishlab kelgan Ahror Mansurov nomzodini taklif etdi.
Ahror Mansurov 1988-yilda Namangan viloyatining Mingbuloq tumanida tug‘ilgan. Ma’lumoti oliy, 2013-yilda Toshkent davlat yuridik institutini tamomlagan.
Mehnat faoliyatini 2013-yili Mingbuloq tuman davlat notarial idorasi notarius yordamchisi sifatida boshlagan. 2014—2016-yillarda Namangan viloyat adliya boshqarmasida, 2016—2019-yillarda Namangan viloyati hokimligining Axborot-tahlil guruhida, 2019—2021-yillarda Prezident Administratsiyasida turli vazifalarda faoliyat yuritgan.
U 2021-yil dekabridan beri Namangan viloyat hokimining o‘rinbosari—Mahalla va oilani qo‘llab-quvvatlash boshqarmasi boshlig‘i lavozimida ishlab kelayotgandi.
Deputatlar taklif etilgan nomzodni qo‘llab-quvvatladi. Ahror Mansurov To‘raqo‘rg‘on tumani hokimi etib tasdiqlandai.
Eslatib o‘tamiz, To‘raqo‘rg‘on tumanining sobiq hokimi Zulayho Mahkamova oldinroq Bosh vazir o‘rinbosari — Oila va xotin-qizlar davlat qo‘mitasi raisi etib tayinlangandi.
Izoh (0)