DXX nodavlat institutga o‘qishga kiritishni va’da qilib, fuqarodan 1500 dollar olgan talabalarni qo‘lga oldi

DXX Samarqand viloyati boshqarmasi hamda viloyat IIB xodimlari hamkorligida o‘tkazilgan tezkor tadbirda Toshkent shahridagi Diplomat University MChJ shaklidagi nodavlat oliy ta’lim muassasasining sirtqi bo‘limiga o‘qishga kiritmoqchi bo‘lgan tovlamachilar faoliyatiga chek qo‘yildi. Bu haqda “Daryo”ga DXX Samarqand viloyati boshqarmasi ma’lum qildi.

Xususan, Ukraina xalqaro Yevropa universiteti Toshkent shahar filialining 2-bosqich talabasi 1999-yilda tug‘ilgan Z.Sh. hamda Qirg‘iziston Respublikasi O‘sh texnologiyalari universitetining 2-bosqich talabasi I.S. fuqarolar — 1997-yilda tug‘ilgan G.Sh. va 1999-yilda tug‘ilgan O.F.larga 1500 dollar evaziga Diplomat University nodavlat oliy ta’lim muassasasining sirtqi bo‘limiga o‘qishga kiritishni va’da qilgan. Fuqarolardan tovlamachilik yo‘li bilan pullarni olayotgan talabalar tadbir vaqtida qo‘lga olingan.

Holat yuzasidan qonunbuzarlarga nisbatan Jinoyat kodeksining tegishli moddalari bilan jinoiy ish qo‘zg‘atilgan.