Rossiya 313 nafar Kanada fuqarosini, jumladan, mamlakat hukumati, Tashqi ishlar va Mudofaa vazirligi rahbarlarini sanksiyalar ro‘yxatiga kiritdi. Bu haqda Rossiya TIV matbuot xizmati xabar berdi.
15-martdan boshlab Kanada bosh vaziri Jastin Tryudo, tashqi ishlar va milliy mudofaa vazirlari Melani Joli va Anita Anand Rossiyaga kirishi taqiqlangan shaxslar “qora ro‘yxati”ga kiritilgan. Shuningdek, Kanada parlamenti quyi palatasining aksariyat deputatlari taqiqqa uchragan.
Bundan tashqari, Rossiyaning sanksiyaga uchraganlar ro‘yxatiga Kanada xalqaro savdo vaziri Meri Ang, jamoat xavfsizligi vaziri Marko Mendisino, innovatsiya va ilm-fan ishlari vaziri Fransua-Filipp Shampan, Ijtimoiy rivojlanish vazirligi rahbari Karina Guld va boshqa yuqori martabali amaldorlar ham kiritilgan.
Rossiya Tashqi ishlar vazirligining ta’kidlashicha, ushbu choralar “Ottava tomonidan talvasada joriy etilgan barcha yangi sanksiyalar”ga javoban qo‘llanilmoqda.
Rossiya Tashqi ishlar vazirligi mamlakatga kirishni taqiqlash qarori majburiy xarakterga ega ekani va “Kanadaning amaldagi rejimining odob-axloqdan tashqariga chiqadigan dushmanona harakatlariga” javoban qabul qilinganini ta’kidlagan.
Avvalroq Kanada hukumati Putin, Medvedov va Rossiyaning bir qator vazirlariga qarshi, shuningdek, Deripaska, Peskov, Solovyov, Simonyan, Ernst va boshqa rossiyaliklarga nisbatan sanksiyalar qo‘llagan. Kanada bosh vaziri Jastin Tryudo Rossiya neftini import qilishni taqiqlab, neftdan olinadigan daromadlar Rossiya prezidenti Vladimir Putin va rossiyalik oligarxlarni qo‘llab-quvvatlashga yordam berayotgan bo‘lishi mumkinligini aytgandi.
Izoh (0)