Polsha bosh vazir o‘rinbosari, hukmron “Huquq va adolat” partiyasi yetakchisi Yaroslav Kachinskiy Ukrainaga NATOning tinchlikparvar missiyasi yoki “yanada kengroq tarkibni” yuborish kerakligini ma’lum qildi, deb xabar beradi “Kommersant”.
Uning so‘zlariga ko‘ra, ushbu missiyas qurollangan va harbiylar tomonidan himoyalangan bo‘lishi kerak. Kachinskiy bu kabi fikrni Ukraina prezidenti Vladimir Zelenskiy bilan bo‘lib o‘tgan uchrashuvdan so‘ng bildirgan. Ular Polsha bosh vaziri Mateush Moraveski, Chexiya bosh vaziri Petr Fial va Sloveniya bosh vaziri Yanez Yansha bilan Kiyevda bo‘lib turibdi.
“NATOning tinchlikparvar kuchlari yoki yanada keng ko‘lamli xalqaro tarkib kerak. Shunday missiya bo‘lishi kerakki, u Ukraina hududida bo‘lgan vaqtida o‘zini himoya qila olsin. Bu, albatta, prezident va hukumat bilan kelishgan holda mamlakat hududiga kiradi va u qurolsiz missiya bo‘lmaydi. Ushbu missiya tinchlikni, gumanitar yordamni ta’minlashga mo‘ljallangan bo‘ladi, ammo tegishli kuchlar — qurolli kuchlar bilan himoyalanadi”, — deydi Polsha bosh vaziri o‘rinbosari. Shuningdek, u Ukrainaga imkon qadar tezroq Yevropa Ittifoqiga a’zolikka nomzod maqomini berish tarafdori ekanini aytgan.
16-mart kuni NATOga a’zo davlatlarning mudofaa idoralari rahbarlari Ukraina masalasiga bag‘ishlangan navbatdan tashqari yig‘ilishda to‘planadi.
Avvalroq Bayden Ukrainani qurol, pul va oziq-ovqat bilan ta’minlashga va’da bergani, Kiyevda kuchaytirilgan komendantlik soati joriy etilgani, Rossiya kuchlari Ukrainaning Xerson viloyatini to‘liq nazoratga olgani to‘g‘risida xabar berilgandi.
Rossiya—Ukraina urushiga oid tezkor, ishonchli yangiliklar va ma’lumotlarni “Daryo”ning Live sahifasi orqali kuzatib boring → @Daryo_Live
Izoh (0)