PACE Rossiyani Yevropa Kengashidan chiqarish uchun ovoz berdi

Yevropa Kengashi Parlament Assambleyasi (PACE) vakillari 15-mart kuni bir ovozdan Rossiyani Yevropa Kengashidan chiqarishga chaqirdi. Bu haqda tashkilot saytida xabar berilgan.

Unga ko‘ra, 216 kishi qarorni yoqlab ovoz bergan, uch kishi betaraf qolgan.

“Assambleya bir ovozdan ma’qullab, Yevropa Kengashi Vazirlar qo‘mitasini Rossiyaning zudlik bilan Yevropa Kengashidan chiqishini talab qilishga chaqirdi”, — deyiladi xabarda.

Assambleya Rossiya Federatsiyasi endi tashkilotga a’zo davlat bo‘la olmaydi, deb hisoblamoqda.

Avvalroq Davlat Dumasi vitse-spikeri, Rossiyaning PACE’dagi delegatsiyasi rahbari Pyotr Tolstoy Rossiyaning Yevropa Kengashidan chiqishi to‘g‘risida qaror qabul qilingani hamda tashqi ishlar vaziri Sergey Lavrovning tegishli xati Yevropa Kengashining bosh kotibiga topshirilgani haqida ma’lum qilgandi.

“Yevropa Kengashidan chiqish to‘g‘risida qaror qabul qilingan. Tashqi ishlar vaziri Sergey Lavrovning tegishli maktubi tashkilot bosh kotibiga topshirilgan”, — deb yozdi Tolstoy o‘zining Telegram-kanalida.

Uning ta’kidlashicha, “Rossiya Yevropa Kengashidan o‘z xohishi bilan chiqmoqda, bu har tomonlama o‘ylangan va ko‘rib chiqilgan qaror”.

Shuningdek, Rossiya Yevropa Kengashi nizomini, Inson huquqlari bo‘yicha Yevropa konvensiyasini, yana to‘rtta konvensiyani va Rossiya manfaatlariga to‘g‘ri kelmaydigan qator hujjatlarni denonsatsiya (bekor) qiladi, dedi federatsiya kengashi raisi o‘rinbosari Konstantin Kosachev.

Avvalroq Rossiya Yevropa kengashining ishlarida ortiq ishtirok etmasligini bildirgandi. O‘sha paytda Rossiya TIV matbuot kotibi Mariya Zaxarova bu Rossiyaning Yevropa kengashidan chiqishini anglatadimi, degan savolga javob bermagan.