“Barselona” Spotify striming servisi bilan hamkorlikni boshladi. Bu haqida klub rasmiy saytida ma’lum qilindi.
Shvetsiyaning musiqa va striming xizmati 2022/23-yilgi mavsumdan boshlab klubning titul homiysiga aylanadi. Shartnoma 4 yilga mo‘ljallangan.
Spotify logotipi “ko‘k-anorranglilar”ning erkaklar va ayollar jamoalari formalarida bo‘ladi. Shuningdek, kelishuv doirasida “Barselona”ning stadioni “Spotify Kamp Nou” nomini oladi.
Avvalroq kataloniyaliklar Spotify bilan kelishuv orqali to‘rt yil ichida 300 million yevro ishlab olishi xabar qilingandi.
Ma’lumot uchun, ayni vaqtda Yaponiyaning Rakuten kompaniyasi “Barselona”ning titul homiysi hisoblanadi. Joriy mavsum jamoaning asosiy homiylari Rakuten va Beko bilan shartnomalar o‘z nihoyasiga yetadi.
Xavi shogirdlari 2021/22-yilgi mavsum La Ligada 27 ta o‘yindan keyin 51 ochko bilan 3-o‘rinda bormoqda.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)