Futbol bo‘yicha Osiyo Chempionlar Ligasi guruh bosqichiga o‘tish uchun pley-off bahsida “Nasaf” 15-mart, seshanba kuni “Baniyas”ga qarshi maydonga tushdi.

Abu-Dabida o‘tgan bahs Qarshi klubining 2:0 hisobdagi g‘alabasi bilan yakunlandi. Uchrashuvning 27-daqiqasida Sherzod Nasrullayev hisobni ochdi. 75-daqiqada esa Husayn Norchayev qarshiliklarning ikkinchi goliga mualliflik qilgan holda jamoasiga ishonchli g‘alabani taqdim etdi.

Shu tariqa “ajdarlar” Osiyo Chempionlar Ligasi guruh bosqichiga yo‘l oldi. Jamoa “As-Sadd” (Qatar), “Al-Faysali” (Saudiya Arabistoni) va “Al-Vihdat” (Iordaniya) jamoalari bilan birga E guruhidan joy oladi. 2022-yilgi Chempionlar Ligasining g‘arbiy mintaqasi guruh bosqichi o‘yinlari 7—27-aprel kunlari bo‘lib o‘tadi.

Qarshiliklarning OChLga yo‘l olishi, Superligada 2-o‘rinni egallagan “So‘g‘diyona”ga OFK Kubogi guruh bosqichida o‘ynash imkonini taqdim etdi. Jizzaxliklar E guruhida “Oltin Asr” (Turkmaniston), “SSKA” (Tojikiston) va “Neftchi” (Qirg‘iziston) klublari bilan bahs olib boradi. “So‘g‘diyona”ning 2022-yilgi OFK Kubogi guruh bosqichi o‘yinlari 24—30-iyungacha bo‘lgan muddatda Tojikistonda bo‘lib o‘tadi. 9—10-avgustda mintaqalar bo‘yicha yarim final va final bahslari o‘tkaziladi. Musobaqaning hal qiluvchi o‘yinini esa 2022-yilning 22-oktabrida o‘tkazish rejalashtirilgan.