Andijon shahridagi Bolalar shaharchasida tarbiyalanuvchilar qolmagani sabab faoliyati tugatilgan. Bu haqda “Daryo” muxbiri xabar bermoqda.
Viloyat hokimi Shuhrat Abdurahmonovning 2022-yil 14-mart kunidagi qarori bilan shaharchada tarbiyalanayotgan bolalarning barchasi vasiylikka, homiylikka, oilaga va oilaviy bolalar uyiga joylashtirilganligi sabab viloyat Xalq ta’limi boshqarmasining 2022-yil 5-fevraldagi Andijon shahrida joylashgan Bolalar shaharchasi faoliyatini tugatish to‘g‘risidagi xatiga rozilik berilgan. Shaharcha binosi, asosiy vositalari, jihozlari va uskunalari bilan to‘liq holda viloyat Xalq ta’limi boshqarmasi balansiga o‘tkazilgan.
Shuningdek, mutasaddi idoralar rahbarlariga shaharcha tugatilishi munosabati bilan ushbu muassasada ishlovchi xodimlarga Mehnat kodeksida belgilangan tartibda ogohlantirish, kafolat va kompensatsiyalar berilishini ta’minlash hamda ularni ishga joylashtirish choralarini ko‘rish topshirig‘i berilgan. Qolaversa, Andijon shahrida tashkil etilgan 1-, 5-, 6-, Asaka tumanidagi 2- va Buloqboshi tumanidagi 3-sonli oilaviy bolalar uyining xarajatlar smetasi va shtatlar jadvalini tegishli tartibda ishlab chiqish vazifalari yuklatilgan.
Yetim bolalar va ota-ona qaramog‘idan mahrum bo‘lgan bolalarni barkamol avlod sifatida shakllanishi hamda ijtimoiy moslashuvini ta’minlash uchun zarur shart-sharoitlar yaratish maqsadida Bolalar shaharchasining 71 nafar tarbiyalanuvchisidan ikki nafari oliy ta’lim va professional ta’lim muassasalariga o‘qishga qabul qilingan. Bir nafari ish bilan ta’minlangan. Qolgan 39 nafari tuman (shahar) hokimlarining tegishli qarorlari bilan alohida oilalarga, 29 nafari oltita oilaviy bolalar uyiga o‘tkazilgan.
Izoh (0)