O‘zbekistonda mast holda transport vositasini boshqarish 5 yilga haydovchilik huquqidan mahrum qilinishiga sabab bo‘lishi mumkin. Bu haqda Ma’muriy javobgarlik to‘g‘risidagi kodeksga kiritiladigan o‘zgartirishda ko‘zda tutilgan.
Oliy Majlis Qonunchilik palatasida Mudofaa va xavfsizlik masalalari qo‘mitasining kengaytirilgan yig‘ilishida mast holda mashina haydaganlik uchun 5 yil muddatga haydovchilik huquqidan mahrum etish va boshqa jazo choralarini og‘irlashtirishni ko‘zda tutuvchi o‘zgartirishlar kiritilishi kutilayotgani ma’lum qilindi.
IIV Jamoat xavfsizligi departamenti YHXX boshlig‘i Olimjon Saidovning so‘zlariga ko‘ra, ayni paytda 8 ta normativ huquqiy hujjat, jumladan, ikkita qonun, bitta prezident qarori hamda to‘rtta hukumat qarori loyihalari tayyorlanmoqda.
“Ma’muriy javobgarlik to‘g‘risidagi kodeksga mast holda mashina haydaganlik uchun transport vositasini boshqarish huquqidan 5 yil muddatga mahrum qilishni ko‘zda tutuvchi o‘zgartirish kiritilishi ko‘zda tutilgan. Amaldagi tartibga ko‘ra, transport vositalarini alkogolli ichimlikdan, giyohvand modda ta’sirida yoki o‘zgacha tarzda mast holda boshqargan haydovchilar transport vositasini boshqarish huquqidan 1 yil-u 6 oydan 3 yilgacha muddatga mahrum qilinadi.
Shuningdek, mazkur qilmish uchun bazaviy hisoblash miqdorining 50 baravari (13,5 million so‘m) miqdorida jarima solinishi qat’iy belgilanmoqda. Amaldagi jarima miqdori bazaviy hisoblash miqdorining 40 baravarini tashkil etadi”, — deydi Olimjon Saidov.
UzReport telekanali orqali efirga uzatilgan lavhada ma’lum qilinishicha, O‘zbekistonda 2022-yil boshidan buyon YPX xodimlari alkogol yoki giyohvand moddalar ta’sirida mast deya gumonlangan 8462 nafar haydovchini to‘xtatgan. Ularning 5536 nafari mast holda ekani tasdiqlangan, 2926 nafari tibbiy tekshiruvdan o‘tishdan bosh tortgan.
Bundan tashqari, yana 953 nafar haydovchi mast holatda avtomobil boshqargani uchun bundan oldin haydovchilik guvohnomasidan mahrum qilingani aniqlangan.
Eslatib o‘tamiz, 2021-dekabr oyidan boshlab O‘zbekistonda haydovchining mastligini aniqlaydigan yangi alkotesterlardan foydalanish boshlandi. Ushbu namuna alkotest topshirayotgan haydovchining yuzini suratga olish imkoniyatiga ham ega.
Izoh (0)