Muhammad Saloh faoliyatini “Barselona”da davom ettirishi mumkin.
Kataloniyaliklar hujum chizig‘ini kuchaytirmoqchi va “Borussiya D” forvardi Erling Holand jamoaning asosiy transfer maqsadi bo‘lib turibdi.
Biroq norvegiyalik futbolchiga boshqa top-klublar ham da’vogarlik qilmoqda, bu esa moliyaviy inqirozni boshdan kechirayotgan “ko‘k-anorranglilar”ning vazifasini murakkablashtiradi.
Shu bois “Barselona” “Liverpul” hujumchisi Muhammad Salohni Holandga muqobil variant sifatida ko‘rmoqda, deb yozadi As.
Qayd etilishicha, “Barselona” ustozi Xavi va klub rahbariyati misrlikning universalligini qadrlaydi hamda uning bir mavsumda 30 ta golni kafolatlashiga ishonadi. Qolaversa, 29 yoshli futbolchining transferi Holandning (transfer) summasidan arzonga tushishi ham muhim ahamiyat kasb etishi mumkin.
“Barselona” Salohning vakillari bilan aloqaga chiqishga ulgurgan va unda ijobiy natijalarga erishilgan. Muhammadning o‘zi ham faoliyatida o‘zgarish bo‘lishiga qarshi emasligi aytilmoqda.
Qayd etish o‘rinli, avvalroq Saloh va “Liverpul”ning shartnomani uzaytirish borasidagi muzokaralari boshi berk ko‘chaga kirib qolgani haqida xabarlar yangragandi.
Saloh 2017-yildan beri “qizillar” safida to‘p surib kelmoqda. Uning klub bilan amaldagi shartnomasi 2023-yilning yozida o‘z nihoyasiga yetadi. Transfermarkt portali uning tovon pulini 100 mln yevroga baholagan.
Muhammad 2021/22-yilgi mavsumda “Liverpul” tarkibida barcha musobaqalarda 35 o‘yin o‘tkazib, o‘z hisobiga 28 ta gol va 10 ta golli uzatma yozdirib qo‘ydi.
Izoh (0)