O‘zbekiston xalq artisti Yulduz Usmonova konsert dasturida ona haqidagi yangi qo‘shig‘ini ijro etdi. U qo‘shiqni ijro etishdan avval marhuma onasi haqida gapirdi, kuylayotganida esa ta’sirlanib, yig‘lab yubordi.
— Onam olamdan o‘tganidan keyin bolalarini qanchalik e’zozlagan bo‘lsa, unga ham Allohning rahmati yog‘ilsin deb duo qildik. Onam o‘limidan avval bizni tanimay qolgan bo‘lsa ham oilamizning katta ustuni bo‘lib turgan ekan. Ba’zan haftada bir yoki oyda bir xabar olsam ham, ko‘nglim to‘q edi. Atrofdagilarning onasi o‘lganida “o‘lim haq” deb taskin beramiz. Ammo onaning o‘limi go‘yo osmonning yiqilishidek og‘ir musibat ekan. Hech bir bandaning boshiga osmon yiqilmasin ekan. Uch yoshlik nabiram ham ikkita buvasi borligidan baxtiyor edi, u ham dardni his qildi. Dadam rahmatli o‘tganida unchalik bilmagan ekanman. Chunki yonimda onam bor edi. Atrofdagilar “Onangiz yoshini yashadi, shu kunga yetkazsin hammani”, deb tasalli berishadi. Ammo bola uchun ona baribir ona. Uch yuz yoshga chiqsa ham bola onasi sari talpinib, bola bo‘laveradi. Ona yurmasa ham, farzandini tanimasa ham qalban sizni his qilib turadi.
Qariganda odam nima bo‘lishini bilmaydi. Balki xastalikka chalinar, yoki urushqoq bo‘lib qolar. Bu yoshga chiqqanda biz nima holga tushamiz Xudo biladi. Shu bois, keksa ota-onalarni vaqtida e’zozlab, injiqliklariga ko‘z yumib yashash kerak.Ba’zan hayot og‘irligini, charchayotganimizni bahona qilamiz. Iloji bo‘lsa, ona o‘tgach bu haqida gapirmanglar, yig‘lab yuboraman deyishadi. Inson onaga yig‘lamasa, yana kimga kuyasan onangdan boshqa. Aslida farzand onasi o‘lgani uchun emas, o‘zining mung‘ayib qolgani uchun yig‘laydi. Hozir kuylaydigan ona qo‘shig‘ini yaratayotganimizda ko‘pchilik sozandalar tashqariga chiqib, xumoridan chiqib yig‘lab keldi. Chunki pandemiya sabab ko‘pchiligi onasidan ayrildi. “Ota-ona uchun ko‘z yoshingni yashirma. Ular uchun qancha yig‘lasang shuncha kam”, dedim. Ular uchun qancha yig‘lasa shuncha arziydi. Ota-onangiz yoningizdami demak baxtlisiz.
Hech qachon onam qaridi, yoshini yashab bo‘ldi, demanglar. Senga ustunligi ortiq nabiralaringga ham yetadi. Ammo boshqalarni bitta qilganda ham bitta onaning o‘rnini bosolmaydi. Hech kim ota-onasidan yetim qolmasin va osmon yelkasiga qulamasin, — deydi O‘zbekiston xalq artisti Yulduz Usmonova.
Eslatib o‘tamiz, Yulduz Usmonovaning onasi Rahima aya Usmonova 2021-yilning 6-noyabr kuni vafot etgan.
Yulduz Usmonovaning “Muhabbat” deb nomlangan yangi konsert dasturidan to‘liq reportajni quyida tomosha qilishingiz mumkin.
Mavzuga doir:
- Sahnani qo‘riqlayotgan Halima va Mansur Agaliyevning ko‘z yoshlari. Yulduz Usmonovaning konsertidan reportaj (video)
- Yulduz Usmonovaning bu yilgi konserti qanday o‘tadi? Yakuniy repetitsiya jarayonidan reportaj (video)
- “Yulduz Usmonova bilan birga yurish — faqat restoranda birga o‘tirish degani emas”. Halima Yulduz Usmonova jamoasidagi o‘rni haqida (video)
- Yulduz Usmonova may oyida ham 5 kunlik konsert beradi. Unda Obid Asomov va Ruslan Sharipov “jonlantirilishi” kutilmoqda (video)
Izoh (0)