Buxoroda nogiron farzandining moddiy ta’minoti uchun to‘lanishi lozim bo‘lgan 111 million so‘m aliment pulini to‘lamay, bo‘yin tovlab yurgan ona 15 sutkaga qamaldi. Bu haqda “Daryo”ga G‘ijduvon tuman sudi sudyasi Boborahim Ochilov xabar berdi.
Ma’lum bo‘lishicha, viloyatning G‘ijduvon tumanida yashovchi 53 yoshli fuqaro L.K. 2006-yilda tug‘ilgan nogiron farzandidan voz kechgan. Jismoniy rivojlanishida nuqsoni bor, tug‘ma nogiron va nikohsiz tug‘ilgan bola oldida onalik majburiyatlarini bajarmagan L.K. sud qarori bilan onalik huquqidan mahrum qilinib, bola foydasiga aliment undirilishi belgilangan.Fuqarolik ishlari bo‘yicha Buxoro shahar sudining 2010-yil 17-maydagi ijro hujjatiga asosan, ayol farzandi ta’minoti uchun aliment to‘lashi belgilangan. Biroq o‘tgan yillar davomida aliment to‘lanmagach, qarzdor onaning alimentdan qarzi 111 million 248 ming 852 so‘mga yetgan.
Jinoyat ishlari bo‘yicha G‘ijduvon tuman sudi 2022-yil 10-mart kuni mazkur ishni ko‘rib chiqib, alimentdan qarzdor onaga 15 sutka ma’muriy qamoq jazosini qo‘llagan.
Izoh (0)