Buxoroda bir necha yildan buyon buyrak yetishmovchiligi tashxisi bilan aziyat chekib kelgan 31 yoshli bemorga otasi donorlik qildi. Bu haqda “Daryo”ga Respublika shoshilinch tibbiy yordam ilmiy markazi viloyat filiali axborot xizmati rahbari Azamat Kattayev xabar berdi.

Ta’kidlanishicha, Respublika shoshilinch tibbiy yordam ilmiy markazi Buxoro filialida ilk bor buyrak transplantatsiyasi jarrohlik amaliyoti o‘tkazilgan.

“Tashxis terminal bosqichga o‘tgani sababli bemorni hayotga qaytarishning yagona usuli — bu buyrakni ko‘chirib o‘tkazish amaliyoti hisoblanadi. Bemorga 62 yoshli otasi donor bo‘ldi. Donor uch oy davomida chuqur tekshirishlardan o‘tkazilgach, retsipiyentga buyrak transplantatsiyasi amaliyoti tavsiya qilindi. Poytaxtdan ham bir guruh transplantolog mutaxassislar taklif etildi”, — deydi filial direktori Tohir Musoyev.

Aytilishicha, ko‘chirilgan buyrak dastlabki soatlarda o‘z faoliyatini kutilganidan ham qoniqarli boshlagan.

“Bemor ota va bolaning ahvoli ayni damda juda yaxshi. Birinchi buyrak transplantatsiyasi amaliyoti bo‘lgani uchunmi, yashirmayman, yuragimda ishonch bilan birga qo‘rquv ham bo‘ldi. Eng kichik nuqtada ham adashishga haqqim yo‘q. Sakkiz soat davom etgan amaliyot muvaffaqiyatli o‘tdi. Operatsiyadan so‘ng ochiq havoga chiqdim. Ho‘ngrab yig‘lab yubordim. Ota-bola hayoti saqlab qolingandan Allohga shukurlar keltirdim”, — deydi Tohir Musoyev.