Samarqand shahri va Past Darg‘om tumanida o‘rtadagi kelishmovchilikni mushtlashuv orqali hal qilishga uringan guruhlar qo‘lga olindi. Bu haqda “Daryo”ga viloyat IIB axborot xizmati ma’lum qildi.
Ma’lum qilinishicha, holat viloyat IIB Jinoyat qidiruv boshqarmasi uyushgan jinoyatchilikka qarshi kurash bo‘limi hamda DXX xodimlari hamkorligida o‘tkazilgan tadbirda oshkor qilingan.“Tezkor xodimlar tomonidan 2022-yil 4-mart soat, taxminan, 20:30 da Samarqand shahar Ogahiy ko‘chasida bir guruh shaxslar o‘rtasida o‘zaro kelishmovchilik janjal orqali hal qilinayotgani to‘g‘risida tezkor ma’lumot olingan va ushbu guruhlar o‘rtasidagi ommaviy janjalning oldi olingan”, — deyiladi viloyat IIB axborot xizmati ma’lumotida.
Holat o‘rganilgach, 9 nafar shaxsga nisbatan 15 sutka ma’muriy qamoq jazosi tayinlangan.
Shuningdek, Past Darg‘om tumanidagi Juma shahri hamda “Arabxona” mahallalarida yashovchi 15 nafar sportchi Samarqand—Juma yo‘nalishdagi avtoshohbekatni zo‘ravonlik va o‘zboshimchalik bilan noqonuniy ravishda egallab olish maqsadida janjal uyushtirilganda holat bartaraf etilgan.
Mazkur guruhlarga yetakchilik qilgan to‘rt nafar shaxsga ham 15 sutka ma’muriy qamoq jazosi tayinlangan.
Holat bo‘yicha qo‘shimcha surishtiruv ishlari olib borilmoqda.
Izoh (0)