O‘zbekiston xalq artisti Yulduz Usmonovaning bu yilgi konsert dasturi 10—25-mart kunlari “Xalqlar do‘stligi” san’at saroyida bo‘lib o‘tadi. “Daryo” muxbirlari konsert dasturidan reportaj tayyorladi. Videoda konsert oldi tayyorgarlik jarayonlari, sahna ortidagi yugur-yugurlar va ijodiy jamoaning qanday ishlashiga guvoh bo‘lishingiz mumkin.
Reja bo‘yicha bu yilgi konsertda 21 ta qo‘shiq ijro etilishi kerak edi. Ammo Yulduz Usmonova muxlislarning iltimosiga ko‘ra dastur so‘ngida “Mayli, jonim” va “Muhabbat” qo‘shiqlarini takroran ijro etdi.
Xonanda navbatdagi konsert dasturida Botir Qodirov va yosh ijodkor Malik bilan duet taronalarni kuyladi. “Yor, biyo” va “Kel-kel” duetlarini muxlislar iliq qarshi oldi.
An’anaga muvofiq xonanda bu yilgi dasturida ham “Navro‘z” raqs ansambli bilan hamkorlik qildi. Ansamblning besh nafar yosh raqqosalari xonanda e’tiboriga tushgani uchun ularni xalqqa tanishtirdi.
“Navro‘z” raqs ansambli rahbari Zarina Ahmedova xonanda tomonidan bastalangan “Avangard” musiqasiga noodatiy raqsga tushdi.
Dasturga qiziqchi Shukrullo Isroilov boshlovchilik qildi.
Boshqa konsertlardan farqli ravishda Yulduz Usmonovaning dasturida “Xalqlar do‘stligi” san’at saroyidagi interyer uning tashabbusi bilan binafsha rangga burkangan.
Ba’zi qo‘shiqlar tinglovchilarni o‘ylashga majbur qilgan bo‘lsa, ayrimlar miriqib raqs tushishlariga sabab bo‘ldi. Dastur avvalda xonanda ham muxlislariga tortinmay raqs tushishlarini ta’kidladi.
Xonanda naqd 10 daqiqa davomida muxlislar keltirgan guldastalarni qabul qildi. Yulduz gullarni olish chog‘ida, lolani o‘zgacha yaxshi ko‘rishini aytdi.
Konsert dasturi so‘ngida Yulduz Usmonova imkoniyati cheklangan kichik muxlisasi bilan uchrashib, uning orzusini ro‘yobga chiqardi. Qizaloqqa Allohdan shifo tilab, uni duo qildi. Qizchaning onasi Yulduz Usmonova oilaning iltimosini yerda qoldirmay, ular bilan uchrashishga rozi bo‘lganidan ta’sirlanib, yig‘ladi. Ushbu manzara primadonna turmush o‘rtog‘i hamda prodyuseri Mansur Agaliyevni ham ta’sirlantirib yubordi.
Konsertdan to‘liq reportajni quyida tomosha qilishingiz mumkin.
Mavzuga doir:
- Yulduz Usmonovaning bu yilgi konserti qanday o‘tadi? Yakuniy repetitsiya jarayonidan reportaj (video)
- “Yulduz Usmonova bilan birga yurish — faqat restoranda birga o‘tirish degani emas”. Halima Yulduz Usmonova jamoasidagi o‘rni haqida (video)
- Yulduz Usmonova may oyida ham 5 kunlik konsert beradi. Unda Obid Asomov va Ruslan Sharipov “jonlantirilishi” kutilmoqda (video)
Izoh (0)