Qamchiq dovonidagi holat yuzasidan shtab tuzilib, haydovchi va yo‘lovchilar umumiy ovqatlanish shoxobchalariga joylashtirmoqda — FVV

Toshkent va vodiydagi viloyatlarni bog‘lab turuvchi Qamchiq dovonida transport harakati qor ko‘chishi xavfi sabab to‘xtatilgan edi. FVV matbuot xizmatining ma’lum qilishicha, holat yuzasidan shtab o‘z ishini boshlagan.

“Qamchiq dovonida qor ko‘chkisi xavfi e’lon qilinganligi tufayli avtomobillar harakati uchun vaqtincha yopilgan edi. Dovon yo‘li yopilishi munosabati bilan Angren shahrida joylashgan “Angrenlend” oshxonasida shtab ish faoliyatini boshladi.

Shuningdek, ayni vaqtda yo‘lda qolib ketgan avtotransport haydovchilari va yo‘lovchilarni Toshkent viloyatining Ohangaron va Angren shaharlari hamda Namangan viloyatining Pop tumanidagi mavjud umum ovqatlanish shoxobchalariga joylashtirish ishlari amalga oshirilmoqda. Ular uchun zaruriy sharoitlar yaratilgan”, – deyiladi vazirlik xabarida.

Avvalroq Qamchiq dovonida ikki tunnel orasidagi avtomobil yo‘lining osti o‘pirilib tushgani haqida xabar berilgandi.