Roman Abramovichga nisbatan joriy qilingan sanksiyalar “Chelsi”ning bankrot bo‘lishiga olib kelishi mumkin.

“Chelsi” Buyuk Britaniya hukumatini Abramovichga nisbatan joriy qilingan sanksiyalarning ta’siri klubning mavsumni yakunlash qobiliyatiga xavf solayotgani haqida ogohlantirgan. Barclays banki londonliklar hisobini vaqtincha muzlatib qo‘ygan 11-mart kuni esa vaziyat yanada murakkablashgan.

The Telegraph nashrining yozishicha, hozirgi vaziyatda London klubi “Stemford Bridj”da yetarli miqdorda xavfsizlikni ta’minlay olmaydi. Shuningdek, ovqatlanishni tashkil qilish uchun yetarli imkoniyatlar bo‘lmaydi. Shu sababdan klub stadionning ayrim sektorlarini yopishga majbur bo‘ladi.

“Chelsi”ning fikricha, agar amaldagi cheklovlar davom etsa, klub mavsumni yakunlay olmaydi. Londonliklar klubga nisbatan qo‘llanilgan cheklovlar yaqin kunlarda ko‘rib chiqilishiga umid qilmoqda.

Xususan, “Chelsi”ga faqat uy uchrashuvlarini tashkil qilish uchun 500 ming funt sarflashga ruxsat berilgan. Biroq Buyuk Britaniya hukumatiga Premyer Liganing bitta o‘yini uchun 800 ming funt sterlingdan 1 million funt sterlinggacha kerak bo‘lishi aytilgan. “Chelsi” hukumatga stadionning ayrim sektorlarida xavfsizlik va oziq-ovqat bilan ta’minlay olmasligi haqida ma’lum qilgan. Klubning ta’kidlashicha, hozirgi vaziyatda yagona variant tribunalarning qisman yoki to‘liq yopilishi bo‘ladi.

Shuningdek, “Chelsi” chipta sotilishi Roman Abramovichga foyda keltirmasligiga e’tibor qaratgan. Klub vakillarining fikricha, bu faqat muxlislarga keraksiz noqulayliklar keltirib chiqaradi va klub imijiga yomon ta’sir qiladi.

Hozirda “Chelsi” o‘z o‘yinlariga chipta sota olmaydi. Shuningdek, londonliklarga transferlarni amalga oshirish va futbolchilar bilan shartnoma uzaytirish ham taqiqlangan.

Bundan tashqari, Premyer Liga Roman Abramovichni “Chelsi”dan chetlatdi. Liganing bildirishicha, biznesmen Buyuk Britaniya hukumati sanksiyalari tufayli klub rahbari sifatida “diskvalifikatsiya qilingan”.

Qayd etilishicha, bu qaror jamoaning o‘yinlarda ishtirok etishi va mashg‘ulotlariga ta’sir qilmaydi.

Eslatib o‘tamiz, 27-fevral kuni Abramovich Ukrainadagi vaziyat tufayli “Chelsi” boshqaruvini klub xayriya fondiga topshirdi. 3-mart kuni esa 2003-yildan beri boshqarib kelayotgan jamoasini sotishga qaror qilganini ma’lum qildi.