Prezident Shavkat Mirziyoyev “Oila va xotin-qizlarni tizimli qo‘llab-quvvatlashga doir ishlarni yanada jadallashtirish chora-tadbirlari to‘g‘risida”gi farmonni imzolagani to‘g‘risida xabar berilgandi. Mazkur hujjatga muvofiq O‘zbekistonda “Ibratli oila” ko‘krak nishoni ta’sis etiladi.
“Ibratli oila” ko‘krak nishoni farovon va barqaror oilalarning hayotiy tajribalarini ommalashtirish maqsadida oila institutini mustahkamlash, oilaviy qadriyatlarni saqlash va rivojlantirishga munosib hissa qo‘shgan oilalarga beriladi. Farmon bilan uni 15-may — Xalqaro oilalar kunida topshirish tartibi belgilangan.
Oila va xotin-qizlar davlat qo‘mitasi bir oy muddatda “Ibratli oila” ko‘krak nishoni to‘g‘risidagi nizom loyihasini tasdiqlash uchun Vazirlar Mahkamasiga kiritishi lozim.
Avvalroq “Oliy ta’lim sohasidagi xizmatlari uchun” hamda “O‘rta maxsus va professional ta’lim sohasidagi xizmatlari uchun” ko‘krak nishonlari ta’sis etilishi ma’lum bo‘lgandi. Bundan tashqari, mamlakatda 2017-yildan beri “Jismoniy tayyorgarlik darajasi”, “Xalqlar do‘stligi”, “Ma’naviy-ma’rifiy ishlar a’lochisi”, “Uy-joy kommunal xizmat ko‘rsatish a’lochisi”, “Xalq ta’limi fidoyisi”, “Mehnatkash dehqon”,“Jangovar hamdo‘stlikni mustahkamlashdagi xizmatlari uchun”, “Mehnat faxriysi”, “Mahalla iftixori” kabi ko‘krak nishonlari ta’sis etilgan.
Izoh (0)