Neymar Janluiji Donnarumma bilan janjallashib qolgani haqidagi xabarlarni rad etdi.
Chempionlar Ligasi 1/8 finali javob o‘yinidan o‘rin olgan “Real”ga qarshi o‘yindan (1:3) so‘ng “PSJ” hujumchisi va darvozaboning kiyinish xonasida mushtlashib ketishiga bir baxya qolgani haqida xabar berilgandi.
Neymar Instagram sahifasida ushbu xabarlar tasvirlangan materialning skrinshotini joylashtirdi va unga Donnarumma bilan yozishmalarini ilova qildi.
Janluiji braziliyalikka mojaro haqidagi yangilikning havolasini yuborib, shunday yozgan: “Salom Ney. Kechagi kun uchun uzr. Bu yangilikni qabul qilib bo‘lmaydi”.
Neymarning javobi quyidagicha bo‘ldi: “Tinchlan, futbolda shunday bo‘lib turadi. Biz bir jamoamiz. Sen juda yoshsan va hali ko‘plab sovrinlarni qo‘lga kiritasan. Boshingni baland ko‘tar va olg‘a yurishda davom et”.
Shundan so‘ng braziliyalik yana bir “stories” joylashtirib, shunday yozdi: “Bu yerda yangiliklar haqida gapirishni yomon ko‘raman... Lekin avvalgi postda chop etilgan ma’lumotlar yolg‘on. Kiyinish xonasida janjal bo‘lmadi!
Mashhurlikka intilayotgan saviyasiz jurnalistlar, yana urinib ko‘ringlar, maylimi?”.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)