Toshkentda sevgan qizini pichoqlab, uni tinch qo‘yishini aytgan yigitni o‘ldirgan erkak 15 yilga qamaldi

Toshkent shahrida sevgan qizi bilan o‘rtasidagi janjalga aralashgan yigitni o‘ldirib, qizni pichoqlagan shaxsga sud hukmi o‘qildi. Bu haqda Oliy sud xabar qildi.

Qayd etilishicha, muqaddam sudlangan yigit bozorda savdo qiluvchi sevgan qizi bilan muloqot paytida o‘rtada kelishmovchilik sodir bo‘lgan. Shu payt janjalga qizning tanishi aralashib, yigitdan chetroqqa o‘tib, gaplashib olishni so‘ragan. Tanish yigit sudlanuvchiga qizni tinch qo‘yishini, u bilan oila qura olmasligini aytgan. Yigit esa o‘zida mavjud oshxona pichog‘i bilan fuqaroning ko‘krak va qorin qismiga bir necha marta urib, qasddan o‘ldirgan.

U bilan tanishib, ishqiy munosabatda bo‘lib kelganmiz. Munosabatlarimiz yaqin bo‘lib ketgani sabab unga qarz berganman. Voqea sodir bo‘lgan kun bozordagi ish joyimda edim. Qo‘ng‘iroq qilib uyga ketib qolma, hozir bozorga yetib boraman, dedi. Ko‘chadagi tanishimdan 500 ming so‘m qarz bo‘lganim sababli qarzimni qaytarishimni so‘rab o‘sha kuni kun davomida bir necha marotaba qo‘ng‘iroq qilgandi. Shu bois qarz bergan tanishimni kechki payt chaqirdim, maqsad qarzimni berib yuborish edi.

Tortishuv bo‘layotganini ko‘rib, u ham aralashdi. Tanishim sudlanuvchiga erkak kishimiz, chetroqqa o‘tib gaplashaylik, deya chetroqqa olib o‘tdi. Men ham ular bilan bordim. Tanishim sudlanuvchiga juda muloyimlik bilan tanbeh berib, meni tinch qo‘yishini aytdi. Ikkalasi ham oxirida o‘zaro qo‘l tashlashishdi va ikki tarafga ketdik. Birozdan so‘ng sudlanuvchi mashinasidan pichoq olib, tanishimning yoniga yugurib keldi va o‘sha yerdagi archa tomonga qarab sudradi. Ular ikkalasi urishib ketishdi. Sudlanuvchi tanishimning qorniga qo‘lidagi pichoq bilan bir necha marotaba urdi. Uni to‘xtatish maqsadida o‘zimni ularning orasiga urdim. Shunda pichoq bilan menga ham bir nechta jarohat yetkazdi. Yerga o‘tirib, so‘ng yotib qoldim...

So‘ng IIB xodimlari kelib meni shifoxonaga olib borishdi. Voqea vaqtida sudlanuvchi meni o‘ldirish bilan qo‘rqitmagan. Sudlanuvchiga nisbatan da’vom yo‘q, faqat olgan qarzini undirib berishingizni so‘rayman, — degan qiz sud zalida.

Holat yuzasidan Jinoyat kodeksining 97-moddasi (qasddan odam o‘ldirish) 2-qismi “l” bandi va 109-moddasi (qasddan badanga yengil shikast yetkazish) 2-qismida nazarda tutilgan jinoyatlarni sodir etganlikda aybli deb topilgan. Unga tayinlangan asosiy jazolarni qisman qo‘shish yo‘li bilan 15 yil 2 oy muddatga ozodlikdan mahrum qilish jazosi tayinlangan.