Sanksiyalar ostida qolgan rossiyaliklar O‘zbekistondan ko‘chmas mulk sotib ola boshladi

Xorijdan ko‘chmas mulk sotib olish istagida bo‘lgan rossiyaliklar endi asosan BAA, Turkiya va O‘zbekistonni tanlashadi, deb hisoblaydi “RIA Nedvijimost’” so‘rovnomasida ishtirok etgan mutaxassislar.

Joriy qilingan xalqaro sanksiyalar tufayli xorijda ko‘chmas mulk sotib olmoqchi bo‘lgan rossiyaliklar endilikda o‘z e’tiborlarini yangi bozorlarga qaratishlariga to‘g‘ri keladi.

Bu kungacha Buyuk Britaniya, Ispaniya, Kipr, Gretsiya, Bolgariya va Chernogoriya davlatlari rossiyalik xaridorlar orasida eng talabgirlari edi.

Mazkur ro‘yxatga yaqin kunlarda O‘zbekiston ham qo‘shiladi, deb qat’iy ta’kidlaydi Nika Estate kompaniyasi egasi Viktor Sadigov.

Bu biznes rivojlantirish va yashash sharoitlari nuqtayi nazaridan juda qiziq bozordir. Sarmoyadorlarning ma’lum qismi o‘z pullarini Toshkent loyihalariga hozirdanoq kiritishni boshlamoqda, — deydi u.

Biroq talab bo‘yicha yetakchi o‘rinda Dubay shahri turibdi, deya tasdiqlaydi mutaxassislar. Bozor aqlbovar qilmas ko‘rsatkichlarni ko‘rsatmoqda, yanvar oyining o‘zidayoq Dubaydagi oldi-sotdi bitimlar soni o‘sishi 80 foizdan ziyod natijani ko‘rsatgan.

Bundan tashqari, dirham kursi bozordagi dollar va yevro bilan yuzaga kelgan vaziyat kabi jiddiy o‘zgarishni namoyish qilmadi.

Avvalroq O‘zbekistonda yanvar oyida uylar sotuvi kamaygani haqida xabar berilgan edi.