Rossiya harbiylari “sukunat rejimi”ni e’lon qilib, Kiyev, Xarkov, Sumi hamda Mariupol viloyatlaridan tinch aholining chiqib ketishi uchun gumanitar koridorlar ochmoqda. Bu haqda Rossiya Mudofaa vazirligiga tayanib, “Interfaks” xabar berdi.
“Sukunat rejimi” 7-mart kuni soat 10:00 dan e’lon qilinadi.
Gumanitar koridorlar “halokatli gumanitar vaziyat” hisobga olingan holda hamda Fransiya prezidenti Emmanuel Makronning Rossiya prezidenti Vladimir Putindan shaxsiy iltimosi sabab ochilmoqda.
Idoraning qo‘shimcha qilishicha, gumanitar koridorlar fuqarolarni aviatsiya transport yordamida Rossiyaga yetkazish imkoniyatini beradi.
Eslatib o‘tamiz, 5-mart kuni Mariupoldagi tinch aholini evakuatsiya qilish uchun “sukunat rejimi” bo‘yicha kelishuvga erishilgandi, biroq jangovar harakatlar davom etdi va mojaro tomonlari bir-birini kelishuvlarni buzganlikda aybladi.
6-mart kuni Ukraina rasmiylari “sukunat rejimi” soat 10:00 dan 21:00 gacha qayta o‘rnatilishini, evakuatsiya esa 12:00 dan boshlanishini e’lon qildi. Ammo bu amalga oshmadi. Mariupolda jang qilayotgan Ukrainaning “Azov” polkining aytishicha, evakuatsiyaga Rossiya qo‘shinlari to‘sqinlik qilgan, ular o‘q uzishda davom etgan. Donetsk esa sukunat rejimini “tinch aholi kolonnasini otib tashlagan” “Azov” jangchilari buzganini da’vo qilmoqda.
Rossiya—Ukraina urushiga oid tezkor, ishonchli yangiliklar va ma’lumotlarni “Daryo”ning Live sahifasi orqali kuzatib boring → @Daryo_Live
Mavzuga doir:
- Urushning 11-kuni: Ukraina shaharlaridan evakuatsiya qilinayotgan aholi o‘qqa tutildi. Rossiyada urushga qarshi namoyishchilar ommaviy hibsga olindi. Urushni urush deb atagan rus nashrlari bloklanmoqda (foto)
- Video: Rossiya bo‘ylab urushga qarshi aksiyalar bo‘lib o‘tmoqda. Politsiya namoyishchilarni ommaviy hibsga olmoqda
Izoh (0)