Rossiyada bugun, 6-mart kuni butun mamlakat bo‘ylab Ukrainadagi urushga qarshi aksiyalar bo‘lib o‘tmoqda. “OVD-Info” xabariga ko‘ra, Rossiyaning 44 ta shahrida politsiya 2000 dan ortiq odamni hibsga olgan.
Xususan, Moskva markazidagi Manejnaya maydoni va Moxovaya ko‘chasida namoyishga chiqqanlar politsiya tomonidan ommaviy hibsga olinayotgani aks etgan videolar tarqaldi.
Jurnalistlar Manejnaya maydonidan majburan chiqarib yuborilmoqda. Aftidan, hudud o‘rab olinmoqda.
Avvalroq Vladivostok va Xabarovskdagi namoyishlar orasidan kamida 15 kishi, Irkutskda yana bir kishi qo‘lga olingani haqida xabar berilgan.
Sankt-Peterburgda Gostiniy dvor yaqinida o‘tkazilayotgan miting ishtirokchilari ham hibsga olingan. “Bumaga” nashrining xabar berishicha, qo‘lga olinganlar orasida jurnalistlar ham bor. Bundan tashqari, guvohlar tomonidan olingan videoda yosh bolali erkak qo‘lga olinganini ko‘rish mumkin. Qayd etilishicha, ota-bola Gostiniy dvor yaqinida birga sayr qilayotgan bo‘lgan.
Ukrainadagi urushga qarshi aksiyalar Nijniy Novgorodda ham bo‘lib o‘tmoqda.
Bir vaqtning o‘zida Moskva ko‘chalarida Rossiyaning Ukrainadagi “harbiy operatsiyasi” tarafdorlari ham miting o‘tkazmoqda.
Rossiya—Ukraina urushiga oid tezkor, ishonchli yangiliklar va ma’lumotlarni “Daryo”ning Live sahifasi orqali kuzatib boring → @Daryo_Live
Izoh (0)