“Men talaba bo‘lganimda ikkita joyda ishlardim. Biridan 56 so‘m, yana biridan 42 so‘m oylik olar edim” — prezident

Shavkat Mirziyoyev oliy ta’lim muassasalari talabalari bandligini ta’minlash orqali ularning turmush darajasini yaxshilash chora-tadbirlari yuzasidan videoselektor yig‘ilishida o‘zining yoshlik yillarini yodga oldi. Mazkur holat “Menimcha” ko‘rsatuvida namoyish etildi.

“Men o‘zim talaba bo‘lganimda ikkita joyda ishlar edim. Bizda “voyennaya kafedra” bor edi va nasoslarni “regulirovka” qilish bo‘yicha. Hozirgacha esimdan chiqmaydi, ikkita joyda yaxshi oylik olar edim. 56 so‘m bitta kafedradan, 42 so‘m bitta kafedradan”, — dedi prezident.

Oliy o‘quv yurti mutasaddilari talabalarning kelgusi faoliyatiga befarq bo‘lmasligi, o‘z navbatida talabalar ham mehnatdan qochmasligi kerak. Ammo baribir asosiy mas’uliyat rektorlar zimmasida ekani ta’kidlandi.

“Rektor bo‘lish uchun qanday intellekt kerak, rektor bo‘lish uchun o‘sha domlalardan sifat nuqtayi nazaridan biliming o‘n karra baland bo‘lishi kerak. Turishing, yurishing… Men bugungi majlisni yopmayman, bu davomiy majlis bo‘ladi. Menga hisobot berish uchun emas, vijdonlaringni oldida, xalqimizning oldida hisobot berishni o‘rganinglar. Men har kvartalda bir marta sizlar bilan, albatta, uchrashaman”, — dedi Shavkat Mirziyoyev.