“Barselona” Adama Traoreni “Vulverhempton”dan to‘liq sotib olish borasida bir qarorga kelmadi.
Kataloniyaliklar qishki transfer oynasida 26 yoshli futbolchini 30 million yevroga sotib olish huquqi bilan ijaraga olgandi.
Xavbek jamoaga darhol moslashib ketgan bo‘lsa ham, rahbariyat uni sotib olish borasida keyinroq qaror qabul qilmoqchi.
“Ko‘k-anorranglilar” yozda “Borussiya D” hujumchisi Erling Holandni xarid qilish istagida. Klub barcha mablag‘ni norvegiyalik hujumchining transferiga yo‘naltirmoqchi.
Traoreni to‘liq sotib olishi uchun hozirda “Vulvehempton” safida ijarada o‘ynayotgan transfer huquqi “Barselona”da bo‘lgan Fransishku Trinkau yordam berishi mumkin.
Ingliz jamoasi 22 yoshli futbolchini 30 million yevroga sotib olish ehtimoli bor. Agar “Vulverhempton” portugaliyalikni olib qolmoqchi bo‘lsa, tomonlar futbolchilarni o‘zaro almashishi mumkin.
Ma’lumot uchun, Adama Traore “Barselona” safida barcha musobaqalarda 6 ta o‘yinda maydonga tushib, 4 ta golli uzatmani amalga oshirdi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)