3—4-mart kunlari Ukrainadan Polshaning Katovitse aeroporti orqali yana 720 nafar O‘zbekiston fuqarosi olib kelindi. Bu haqda TIV rasmiy vakili xabar berdi.
Shunday qilib, 4-mart holatiga ko‘ra, umumiy hisobda 11 ta aviareys bilan 2 579 nafar O‘zbekiston fuqarosi vatanga qaytarilgan.
Katovitse aeroportidan uchta qo‘shimcha parvoz kutilmoqda: 4-mart kuni soat 14:30 va 16:00 da hamda 5-mart soat 03:00 da.
Ma’lum qilinishicha, Polsha hududida O‘zbekistonning 1 480 dan ortiq fuqarosi qolmoqda. Ulardan 700 nafari Polsha davlat chegarasidagi to‘planish nuqtasiga, 780 nafari esa Katovitse aeroportiga joylashtirilgan.
Polshadagi O‘zbekiston elchixonasining ma’lumotlariga ko‘ra, Katovitse aeroporti bugungi kunda odamlar bilan to‘lgan. O‘zbekistonlik diplomatlarning sa’y-harakatlari natijasida O‘zbekiston fuqarolari sharoitlar yaratilgan, shu jumladan, ular issiq ovqat bilan ta’minlangan. Shahar ma’muriyati tomonidan aeroport binosiga kirish va yo‘lovchilarni ro‘yxatga olish uchun soddalashtirilgan tizimni ishga tushirilgan. Jamoat tartibi politsiya va mahalliy ko‘ngillilar tomonidan nazorat qilinmoqda. Bolali ayollar va keksalar uchun maxsus koridor tashkil etilgan. Barcha fuqarolarga oldindan tayyorlangan ro‘yxatlar asosida xizmat ko‘rsatilmoqda.
“Fuqarolarning vatanimizga tezroq qaytish istagini anglagan holda barcha yurtdoshlarimizdan xotirjamlikni saqlashlari, vahimaga berilasmliklari, provokatsiyalar va ziddiyatli vaziyatlarga uchmasliklarini so‘raymiz. Ishontirib aytamizki, barcha fuqarolar mamlakatimizga qaytariladi”, — deyiladi xabarda.
Avvalroq TIV Polsha aeroportida O‘zbekiston fuqarolari orasida janjal va mojaro bo‘lgani haqidagi xabarlar yuzasidan izoh bergandi.
Izoh (0)