Belarusning Brest viloyatida Rossiya—Ukraina muzokaralarining ikkinchi raundi yakuniga yetdi. Ukraina prezidenti ofisi rahbarining yordamchisi Mixail Podolyak tomonlarning tinch aholini olib chiqish uchun xavfsiz ijtimoiy yo‘lak tashkil qilishga kelishib oldi. Podolyakning muzokaralar haqidagi mulohazalari yozuvi Ukraina prezidentining matbuot xizmati tomonidan tarqatilgan, deb yozmoqda Meduza.
“Tomonlar tinch aholi vakillarini evakuatsiya qilish uchun ijtimoiy yo‘laklar tashkil qilishni ta’minlash borasida o‘zaro kelishib oldi, shuningdek, tibbiyot vositalari hamda oziq-ovqatlar o‘t ochish vaqtincha to‘xtatilgan paytda evakuatsiyalar jarayoni bilan birga amalga oshirilishi belgilab olindi”, — deya muzokaralar yakuni yuzasidan kommunikeni o‘qib eshittirgan Podolyak.
U Ukraina tomonining o‘zi kutgan natijalarga erishmaganini qayd etgan. Avvalroq Podolyak Kiyevning ijtimoiy yo‘laklardan tashqari zudlik bilan o‘t ochishni to‘xtatish va tinchlik sulhi tuzishni muzokaralarning eng asosiy mavzusi deb hisoblayotganini bildirgan.
Rossiya delegatsiyasi rahbari, Rossiya prezidentining yordamchisi Vladimir Medinskiy ham tomonlarning ayrim masalalarda o‘zaro kelishib olganini ta’kidlagan, deya xabar qildi “Interfaks”. U delegatsiyalarning ijtimoiy yo‘laklarni qo‘llab-quvvatlash, ushbu evakuatsiya hududlarida o‘t ochishni vaqtinchalik to‘xtatib turish yuzasidan kelishib olinganini tasdiqlagan.
Ukraina va Rossiya muzokaralari ishtirokchilarining birinchi uchrashuvi Ukraina – Belarus chegarasida 28-fevral kuni o‘tkazilgandi.
Rossiya—Ukraina urushiga oid tezkor, ishonchli yangiliklar va ma’lumotlarni “Daryo”ning Live sahifasi orqali kuzatib boring → @Daryo_Live
Izoh (0)