Osiyo futbol konfederatsiyasi 2022-yilgi Chempionlar Ligasining g‘arbiy mintaqasi guruh bosqichi o‘yinlariga mezbonlik qiladigan shaharlar ro‘yxatini ma’lum qildi.
Markazlashgan tizimda o‘tadigan guruh bosqichi o‘yinlariga Saudiya Arabistonidagi shaharlar mezbon bo‘ladi.
Unga ko‘ra, D guruhidan o‘rin olgan “Paxtakor” o‘z o‘yinini Burayda shahrida o‘tkazadi. “Sherlar” “Ad-Duhayl” (Qatar), “Sepahon” (Eron) jamoalari bilan kuch sinashadi. To‘rtinchi jamoa nomi pley-off bosqichi natijasiga ko‘ra hal bo‘ladi.
E guruhining o‘yinlari esa Dammam shahrida bo‘lib o‘tadi. Qarshining “Nasaf” jamoasi ushbu guruhdan joy olish ehtimoli bor. Ro‘ziqul Berdiyev shogirdlari 15-mart kuni BAAning “Baniyas” jamoasi bilan kuch sinashadi. Uchrashuv g‘olibi esa “As-Sadd” (Qatar), “Al-Faysali” (Saudiya Arabistoni) va “Al-Vihdat” (Iordaniya) jamoalari bilan birga E guruhidan joy oladi.
Chempionlar Ligasining A va B guruhi o‘yinlari Ar-Riyodda, C guruhi o‘yinlari esa Jidda shahrida bo‘lib o‘tishi ko‘zda tutilgan.
2022-yilgi Chempionlar Ligasining g‘arbiy mintaqasi guruh bosqichi o‘yinlari 7—27-aprel kunlari bo‘lib o‘tadi.
Ma’lumot uchun, “Nasaf” “Baniyas” ustidan g‘alaba qozonsa, Superligada 2-o‘rinni olgan “So‘g‘diyona”ga OFK Kubogi yo‘llanmasini taqdim etadi. Mag‘lubiyatga uchragan taqdirda esa qarshiliklarning o‘zi OFK Kubogida qatnashadi.